काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टी पदाधिकारीसहित स्थायी समिति र पोलिटब्युरोसमेत टुंगो लगाउने तयारी गरेका छन् । उनले सबैका पदाधिकारी टुंगो लगाएर केन्द्रीय समिति बैठकमा पेश गर्ने तयारी गरेका हुन् ।

पार्टी पदाधिकारी बनाउने भएपछि महासचिवसहित अन्य पदमा समेत थप जटिलता देखिने भएको छ । यता वरिष्ठ उपाध्यक्षमा नारायणकाजी श्रेष्ठलाई प्रस्ताव गर्ने तयारी भए पनि कृष्णबहादुर महरा र मातृका यादवले इच्छा देखाएपछि थप चुनौती थपिएको छ ।

चुनाव गरे आफू वरिष्ठ उपाध्यक्षमा प्रतिस्पर्धा गर्न तयार रहेको यादवले बताएका थिए । यस्तै महराले आफू महासचिव नभए वरिष्ठ उपाध्यक्ष हुनु पर्ने माग राखेका छन् ।

यता, महासचिवमा वर्षमान पुन र जनार्दन शर्मा दावेदार रहेका छन् । सोही पदमा पम्फा भुसाल, देव गुरुङ र शक्ति बस्नेतसमेत आकांक्षी भएका छन् । यसैगरी कोषाध्यक्ष र उपमहासचिवमा को–को बस्ने भन्ने विषय अन्योलता छाएको छ ।