काठमाडौँ । एमालेभित्र उपाध्यक्ष विष्णु पौडेलको संयोजकत्वमा अर्न्तघातीको खोजी कार्य जारी रहेकाबेला एमाले कास्कीमा अन्तर्घातको कलह पुनः बल्झिएको छ ।

उपमहासचिव पृथ्वी सुब्बा गुरुङसहित सचिव पद्मा अर्याल, केन्द्रीय सदस्य जगत बि.क., कास्की जिल्ला इञ्चार्ज भीम कार्कीमाथि आवश्यक छानबिनसहित कारबाहीको माग गर्दै अध्यक्ष केपी शर्मा ओलीसँग माग गरिएको छ । ‘संगठन विभाग प्रमुख खगराज अधिकारीको उक्साहटमा उनीहरूमाथि कारबाहीको माग गरिएको हो’, स्रोतले भन्यो ।

जिल्ला सचिव बैनबहादुर अधिकारी, उपमहासचिवद्वय नवराज ओझा र दर्शन लामा, मेयरमा पराजित कृष्णबहादुर थापा र उपमेयरमा विजयी मन्जुदेवी गुरुङलगायतले अध्यक्ष ओलीलाई भेटेरै लिखित रुपमा कारबाहीको माग गरेका हुन् । गत स्थानीय निर्वाचनमा सार्वजनिक अडियोका साथै उनीहरूले गरेका शंकास्पद गतिविधिको विवरणसमेत पत्रमा उल्लेख गरिएको बताइएको छ ।

गण्डकी प्रदेशको मुख्यमन्त्री बनिसकेका उपमहासचिव गुरुङले कास्की जिल्लामा आफ्नै समूह बनाएका छन् । उता संघीय सरकारको गृह तथा स्वास्थ्यमन्त्री भइसकेका अर्का केन्द्रीय सदस्य खगराज अधिकारीको भिन्न समूह सक्रिय छ । ‘खगराज अधिकारीको समूहले उपमहासचिव सुब्बा लगायतको समूहलाई कारवाहीमो माग गरेको देखिन्छ, अहिले अधिकारी र सुब्बा दुबै काठमाडौमा छन्’, स्रोतले भन्यो ।

यी दुई समूहको सक्रियताले पार्टीको आन्तरिक निर्वाचनदेखि हालै सम्पन्न स्थानीय तहको निर्वाचनसम्म त्यसको प्रभाव परेको हो । पोखरा महानगरपालिकाको निर्वाचनमा गुरुङ निकटका दीपक पौडेलले मेयरको टिकट पाएपछि अधिकारी पक्षका नेता, कार्यकर्ताहरूले पुरानो भिडियो सार्वजनिक गर्दै टिकट खोसेको आरोप लागेको थियो ।

सार्वजनिक उक्त भिडियोमा पौडेलले पोखराको एउटा सुन पसलबाट गहना चोरेको दृश्य सार्वजनिक भएपछि उनको टिकट खोसिएको थियो । त्यसपछि अधिकारी समूहका कृष्ण थापालाई टिकट दिइएको थियो । थापाले एमालेका पूर्व नेता एवं समाजवादीका धनराज आचार्यसँग पराजित भएका थिए । एमालेभित्र ५१ हजार कार्यकर्ताहरुले अर्न्तघात गरेको रिपोर्ट तयार पारिएको भए पनि सार्वजनिक भएको छैन ।