काठमाडौं । आज सत्ता गठबन्धनको बैठक बस्दैछ । आज (शुक्रबार) विहान ९ बजे प्रधानमन्त्रीको सरकारी निवास बालुवाटारमा पाँच दलीय गठबन्धनका शीर्ष नेताको बैठक बस्न लागेको हो ।
चुनावको मिति घोषणापछिको सत्ता गठबन्धनको पहिलो बैठक पनि हो । बिहीबार सरकारले प्रदेश र प्रतिनिधिसभा निर्वाचन मंसिर ४ गते गर्ने निर्णय गरेको थियो ।

बुधबार साँझ प्रधानमन्त्रीको सरकारी निवास बालुवाटारमा बसेको पाँच दलीय गठबन्धनको बैठकमा तालमेलको मोडालिटीबारे औपचारिक रुपमा बहस प्रवेश भएको थियो ।

बुधबारकै बैठकमा गठबन्धन दलहरुका वीचमा सिट बाँडफाँडका लागि पहिले गठबन्धन दलका दोस्रो तहका नेताहरु रहेको कार्यदल निर्माण गर्ने, कार्यादलले नीतिगत मापदण्ड बनाउने र त्यसरले दिएको रिपोर्टका आधारमा शीर्ष नेताहरु बसेर गठबन्धन दलहरुका बीचमा सिट बाँडफाँड गर्ने समझदारी बनेको छ ।सोही समझदारीका आधारमा आज बैठकबाट कार्यदल निर्माण गरिसक्नेछन् ।

त्यसरी निर्माण भएको कार्यादलले तयार पार्ने नीतिगत मापदण्डका आधारमा सिट बाँडफँड मिलाउने समझदारी गठबन्धनका दलहरुका बीचमा बनेको नेपाली कांग्रेसका बरिष्ठ नेता रामचन्द्र पौडेलले जानकारी दिए ।
आज बैठकबाट बनेको गठबन्धन कार्यदलमा को–को रहने र सिट बाँडफाँट कसरी गर्ने विषयमा केन्द्रित भएर छलफल शुरु हुने माओवादी केन्द्रका बरिष्ठ उपाध्यक्ष नारायणकाजी श्रेष्ठले बताए ।

०७४ मा जितेको सिट, स्थानीय तहको मत परिणाम, उम्मेदवारको व्यक्तित्व र सांगठनिक शक्तिलाई आधार बनाएर तालमेलको मोडालिटी बनाउनेबारे गठबन्धनमा छलफल भइरहेको एक नेताले बताए ।