काठमाडौँ । काठमाडौँ उपत्यकाको फोहोर व्यवस्थापन हुँदै आएको बञ्चरेडाँडा–सिसडोलका स्थानीयबासीले आन्दोलन फिर्ता लिएका छन् । आगामी भदौ १ देखि गर्ने भनिएको आन्दोलन फिर्ता लिएका हुन् ।

आइतबार बसेको मन्त्रिपरिषद बैठकले सहरी विकास मन्त्रालयलाई सम्झौता कार्यान्वयन गर्न निर्देशन दिँदै तीन महिनाभित्र समस्या समाधानको संयुक्त प्रतिवेदन मन्त्रिपरिषदमा पेस गर्ने निर्णयसँगै आन्दोलन फिर्ता लिएको संघर्ष समितिले जनाएको छ ।

स्थानीयबासीले दिएको अल्टिमेटम सकिनुअघि मात्रै सरकारले प्राविधिक परामर्शदातासहितको समिति गठन गरेको जानकारी दिएपछि बञ्चरेडाँडामा फोहोर लैजान दिने निर्णय गरिएको हो ।

यतिका वर्ष फोहोरको जोखिम मोलेर बसे पनि अब तीन महिना प्राविधिक समितिलाई सल्लाह सुझाव दिई काम गर्ने समितिका एक सदस्यले बताए । तीन महिनाको अवधिमा समितिलाई सल्लाह र परामर्श दिन र उनीहरूलाई सहयोग गर्न समिति तयार भएको हो ।