काठमाडौँ । नेपाली कांग्रेसका प्रवक्ता डा. प्रकाशशरण महतले पार्टीभित्रको गतिविधिलाई नजिकबाट हेरेको बताएका छन् । पार्टीका वरिष्ठ नेता डा. शेखर कोइराला पक्षको गतिविधिप्रति उनले यस्तो बताएका हुन् ।

मंगलबार पार्टी कार्यालय सानेपामा आयोजित पत्रकार सम्मेलनमा प्रवक्ता महतले समानुपातिक पद्धतिको बन्दसूची सहमतिबाटै तयार पारेको बताउँदै कुनै एउटा पक्षलाई पक्षपोषण गर्ने गरी सूची नबनेको दाबी गरे । उनले अहिले भइरहेको विरोध अनावश्यक भएको बताए ।

‘पदाधिकारी, पूर्व पदाधिकारी, संसदीय बोर्डका सदस्यहरू समावेश भएर सहमतिबाट त्यो सूची पेश गरिएको छ, त्यहाँ कतिपय त्रुटिहरु छन्, तर एउटा पक्षलाई पक्षपोषण गरेर अर्कोलाई कमजोर गर्ने केही भएको छैन,’ उनले भने ।

शेखर पक्षका नेताले गर्दै आएको विरोधप्रति उनले भने, ‘यो पार्टी अनुशासनको कुरा होइन ।’