काठमाडौं । नेकपा एमालेका अध्यक्ष केपी शर्मा ओलीले आफना आलोचकलाई टिकट नै नदिएर पजनी गरेको बेला माओवादी केन्द्रमा पनि त्यही प्रवृति दोहोरिएको छ ।

माओवादी केन्द्र र नेकपा एमाले एकै रहँदा पार्टी एकता जोगाउनका लागि अध्यक्ष प्रचण्डले केही लचकता देखाएरै भएपनि एकता जोगाउनु पर्ने भन्दै लविङमा रहेको र पार्टी विभाजनको अन्तिम समयसम्म ओली र प्रचण्ड मिलाउन कसरथ गरिरहेका हरिबोल गजुरेल पनि एमालेमा घनश्याम भुसाल र भीम रावल जस्तै पजनीमा परेका छन् ।

पार्टी विभाजनको अन्तिम समयमा टोपवहादुर रायमाझी लगायतका नेताहरुले माओवादी छोडेर एमाले रोज्दा हरिबोलले भने मूल पार्टी नै रोजेर माओवादीमै बसेका थिए । त्यसपछि उनी अहिले माओवादी केन्द्रको उपमहासचिव छन् । उनले उपमहासचिव भन्दा सिनियर पद पार्टीमा खोजेका थिए । तर अन्तिममा उनलाई माओवादीले पदाधिकारी टुंग्गो लगाउँदा अन्य ६ नेतासहित उपमहासचिव बनाएको थियो ।

उनी यसपटकको निर्वाचनमा पनि प्रतिनिधीसभामा उम्मेदवार बन्न चाहान्थे । सिन्धुली २ जहाँ उनले २०७४ सालमा चुनाव जितेका थिए, त्यहीबाट उनी यसपटक पनि उम्मेदवार बन्न चाहान्थे । तर उनलाई नाम सिफारिस गर्ने क्रममा सिन्धुली जिल्ला इन्चार्ज समेत रहेका पार्टी पोलिटब्यूरो सदस्य राजन दाहालले उम्मेदवार सिफारिसबाट नै रोक्न खोजे ।

जिल्लाबाटै उनको नाम समानुपातिक तर्फ पठाएर प्रत्यक्ष तर्फ रोक्ने प्रयास भएको थियो । पछि प्रदेश कमिटिले मात्रै उनको नाम पनि प्रत्यक्ष तर्फ सिफारिस गरेर केन्द्रमा पठाएको थियो । तर केन्द्रले उनलाई टिकट दिएन । उनको स्थानमा राजन दाहाललाई माओवादी केन्द्रले टिकट दिएको छ ।

भुसाल र रावलले ओलीलाई निरन्तर चुनौति दिएकै कारण टिकटबाट बञ्चित गरिएको छ ।

एमालेको दशौं महाधिवेशनमा रावलले ओलीसँग अध्यक्षमा चुनावी प्रतिस्पर्धा गरेका थिए भने भुसालले उपाध्यक्षमा । रावल त्यसयता एमालेको केन्द्रीय कमिटिमा बसेका थिएनन । तर भुसाल स्थायी समिति सदस्य थिए । ओलीले टिकट दिने बेला निर्वाचन क्षेत्रमा सर्वसम्मत सिफारिस भएका रावलको नाम काटेर माओवादी छोडेर एमालेमा आएका झपट बोहोरालाई टिकट दिएका थिए ।

भुसालको निर्वाचन क्षेत्र नम्बर ३ मा तालमेलको नाममा राप्रपालाई छोडिदिएका थिए भने भुसालले निर्वाचन लड्न चाहेको अर्काे क्षेत्र रुपन्देही १ मा पार्टी सचिव छविलाल विश्वकर्मालाई टिकट दिएका थिए ।

ठीक त्यसैगरी प्रचण्डले पनि हरिवोललाई सिन्धुलीमा टिकट नदिएर ओलीले झै गरेको माओवादी सिन्धुलीका स्थानीय नेताहरु बताउँछन् ।

गजुरेल अहिले पनि वाम गठबन्धनको पक्षधर थिए । नेकपा कालमा पार्टी विभाजनको अन्तिम समयमा प्रचण्डले त्याग गरेरै भएपनि पार्टी एकता जोगाउनु पर्ने अभिब्यक्ति दिएकै कारण उनलाई एमालेमा ओलीले आफना आलोचक रावल र भुसाललाई झै पजनीमा पारिएको चर्चा माओवादीभित्र चलेको छ ।