काठमाडौँ । युवा तथा खेलकुद मन्त्री डिगबहादुर लिम्बूले सरकारले चितवनमा निर्माणाधीन क्रिकेट रंगशालाको स्वामित्व ग्रहण गर्ने बताएका छन् ।

आइतबार प्रतिनिधिसभा बैठकमा बोल्दै मन्त्री लिम्बुले सरकारले चितवनमा ‘धुर्मुस सुन्तली फाउण्डेसन’ले निर्माण शुरु गरेको क्रिकेट रंगशालाको स्वामित्व ग्रहण गर्ने बताएका हुन् ।

‘धुर्मुस सुन्तली फाउण्डेसनले निर्माण प्रक्रिया अगाडि बढाएको रंगशालाको निर्माण कार्य अधुरो छ, अत्यन्त जटिल समस्याग्रस्त छ,’ उनले भने, ‘यो विषयमा सरकारले सम्बोधन गर्ने र यसको स्वामित्व ग्रहण गरेर बाँकी काम सम्पन्न गर्ने गरी प्रक्रिया अगाडि बढिरहेको छ ।’

उनले स्वामित्व ग्रहणका लागि आवश्यक प्रक्रिया अगाडि बढाइएको बताए । सरकारले स्वामित्व ग्रहण गरेपछि यसको निर्माणका लागि बजेट व्यवस्थापन गर्ने उनको भनाइ थियो ।

उनले विद्यालयमा बालबालिकाको लागि खेलकुद प्रतियोगिता आयोजना गर्न सबै स्थानीय तहमा बजेट विनियोजन गरिएको बताए ।

यस्तै खेलकुद गतिविधि सञ्चालन गर्न सय वटा खेलकुद संघहरूलाई २ लाख ५० हजारको दरले अनुदान दिने गरी बजेट व्यवस्थापन गरिएको बताए ।