काठमाडौं । नेकपा एकीकृत समाजवादीमा सम्मानित नेता झलनाथ खनालले फरक मत लैजाने गरी तयारी गरेपछि एकीकृत समाजवादीले पार्टीका केन्द्रीय कमिटी, पोलिटब्युरो र स्थायी कमिटीलगायत सबै तहका बैठकहरू अनिश्चितकालका लागि स्थगित गरेको छ । अध्यक्ष माधव कुमार नेपाल शनिबार तीन देशको भ्रमण सकेर स्वदेश फर्किए लगत्तै पूर्व निर्धारित बैठकहरू स्थगन भएका हुन् ।

पार्टीको लागि दूरगामी महत्वका राजनीतिक र सांगठनिक विषयहरूमा छलफल गर्न तथा निर्णय लिन आयोजना गरिएको सचिवालयसहित सबै बैठक पर्याप्त तयारी हुन नसकेको कारण अर्को सूचना नभएसम्म स्थगित गरिएको उपमहासचिव गंगालाल तुलाधरले बताए ।

यसअघि नेकपा एसले साउन १६ र १७ गते स्थायी कमिटी, १८ र १९ मा पोलिटब्युरो र साउन २० र २१ गते केन्द्रीय कमिटी बैठकको मिति तय गरेको थियो ।

बैठकमा झलनाथ खनालले पार्टी अहिले हिडिरहेको बाटो र माधव नेपालको प्रस्तावमा फरक मत लैजाने तयारी गरेका थिए । नेता खनालले फरक मत लाने तयारी गरेपछि त्यसले पार्टीभित्र थप समस्या सिर्जना गर्न सक्ने ठानेरै नेपालले स्वदेश फर्केलगत्तै निर्धारित बैठक रोकेको एक नेताले मेरोन्यूजलाई बताए ।