भक्तपुर । भक्तपुरको सानोठिमीस्थित बाल सुधारगृहमा बन्दी बालबालिकाहरूको प्रदर्शनको क्रममा झडप हुँदा ६ जना बन्दी र १२ जना सुरक्षाकर्मी घाइते भएका छन् ।

सुधार गृहको गेट तोडफोड गरी सोमबार दिउँसो ठूलो संख्यामा बन्दीहरू भाला, खुकुरी लगायतका हतियार बोकेर प्रदशर्न गर्दा सुरक्षाकर्मीसँग भएको झडपमा ६ बन्दी र प्रहरी निरीक्षक सञ्जीव ओलीसहित १२ जना सुरक्षाकर्मी घाइते भएका प्रमुख जिल्ला अधिकारी खगेन्द्र रिजालले जानकारी दिए । निरीक्षक ओलीको अहिले मध्यपुर अस्पताल ठिमीमा उपचार भइरहेको छ ।

घाइते बन्दीमध्ये एकको वीर अस्पतालमा र अन्यको महाराजगन्जस्थित त्रिवि शिक्षण अस्पतालमा उपचार भइरहेको रिजालले जानकारी दिए ।

आइतबार सुधार गृहमा एक जनाको मृत्यु भएपछि त्यहाँ मृतकका आफन्तले आइतबार नै प्रदर्शन गरेका थिए । भित्र रहेका अन्य अधिकांश बालबालिकाले पनि सोमबार प्रदर्शनकारीलाई साथ दिँदै तोडफोड गरी भागेको भक्तपुरका प्रमुख जिल्ला अधिकारी रिजालले बताए ।