काठमाडौँ । ललिता निवास जग्गा प्रकरणमा प्रहरीको केन्द्रीय अनुसन्धान ब्युरो (सीआईबी)ले पूर्वभूमिसुधार मन्त्री चन्द्रदेव जोशीसँग सोमबार साँझ बयान लिएको छ । जोशीलाई प्रहरीले सोमबार दिउँसो बयानका लागि बोलाए पनि आज बयान हुन नसक्ने भन्दै फर्काएको थियो ।

सोमबार साँझ ट्विट गर्दै पूर्वमन्त्री जोशीले बयानपछि आफ्नो बोझ हलुका उल्लेख गरेका छन् ।

‘अन्ततः बोझबाट हलुका भएको छु । सीआईबी समक्ष बयान दिएको छु । सीआईबीलाई धन्यवाद । ललिता निवास काण्डको सम्बन्धमा मेरो भनाइ सार्वजनिक नै छ, ’ उनले ट्वीटरमा लेखेका छन्, ‘चाहिएको बेला आवश्यक सहयोगका लागि तयार छु ।’

उनले २०६९ असोज १८ गते ललिता निवासबारे मन्त्रिपरिषदको निर्णय हुँदा आफू मन्त्री नभएको बताएका छन् ।

तत्कालीन मन्त्री जोशीले ललिता निवास जग्गा व्यक्तिको नाममा बेच्ने क्रममा टिप्पणी सदर गरेको आरोपमा ब्युरोले उनीसँग बयान लिएको हो ।

अन्ततः बोझबाट हलुका भएको छु । CIB समक्ष बयान दिएर अइयो । CIB लाइ धन्यवाद । ललिता निवास काण्डको सम्बन्धमा मेरो भनाई सार्वजनिक नै छ । चाहिएको बेला आवश्यक सहयोगको लागि तत्पर छु ।

— Chandra Deo Joshi (@cdjoshiNPL) August 21, 2023