काठमाडौं । सरकार र आन्दोलनरत शिक्षकहरुबीच बिहीबार भएको वार्ता निष्कर्षविहीन भएको छ।

उपप्रधानमन्त्री तथा गृहमन्त्री नारायणकाजी श्रेष्ठको पहलमा बिहीबार बिहान भएको वार्ता विना निष्कर्ष सकिएको हो ।

गृह मन्त्रालयमा भएको वार्तामा शिक्षामन्त्री अशोक राई र सचिव सुरेश अधिकारी समेत सहभागी थिए ।

छलफलमा गृहमन्त्री श्रेष्ठले शिक्षकका समस्या सबैको साझा समस्या भएको उल्लेख गर्दै समाधानका लागि सरकार प्रतिबद्ध भएको बताएका थिए। शिक्षकहरूको माग सम्बोधनका लागि पहल गर्ने उनले आश्वासन दिएका थिए।

शिक्षक प्रतिनिधिहरूले भने विधेयक फिर्ता नभएसम्म आन्दोलनका कार्यक्रम फिर्ता नहुने बताएका छन् ।

विद्यालय शिक्षा सम्बन्धी कानुनलाई संशोधन र एकिकरण गर्न बनेको विधेयकका केही व्यवस्था संशोधनको माग गर्दै देशभरका शिक्षकहरु काठमाडौंमा आन्दोलन गरिरहेका छन्। उनीहरुले बिहीबार दोस्रो दिन पनि आन्दोलन गर्ने जनाएका छन् ।