काठमाडौं । नेपालले रुसी सेनामा जान रोक लगाएपनि अवैध बाटोबाट रुसी सेनामा पठाउने एक गिरोहलाई नै प्रहरीले पक्राउ गरेको छ । काठमाडौं प्रहरी परिसरका प्रवक्ता एसपी कुमोद ढुंगेलले रुसी सेनामा पठाउने गिरोह नै पक्राउ परेको पुष्टि गरे ।
‘नेपाली युवालाई रुसी सेनामा पठाउने गिरोहका केहीलाई पक्राउ गरिएको छ । एघार जना एकपटकमा र अर्काे एक जना एकपटक गरी अहिलेसम्म १२ जना पक्राउ परेका छन्,’ एसपी ढुंगेलले भने ।

अवैध रुपमा सरकारलाई समेत जानकारी निदई रुसी सेनामा गएका ६ नेपालीको मृत्यु भएपछि सरकारले अवैध रुपमा नेपाली युवा रुसी सेनामा पुगेको तथ्य थाहा पाएको थियो । त्यसपछि सरकारले त्यसरी रुसी सेनामा नेपालीलाई पठाउने हरुमाथी कडा निगारानी सुरु गरेको हो । त्यही क्रममा नेपाली युवकलाई रुसी सेनामा पठाउने गिरोहका १२ जनालाई प्रहरीले पक्राउ गरेको छ ।

उनीहरूमध्ये ११ जना मंसीर १३ गते र एक जना सोमबार (१८ गते) पक्राउ परेका हुन् ।

उनीहरुविरुद्ध प्रहरीले अनुसन्धानका लागि म्याद थपसमेत गरिसकेको छ।