काठमाडाैं । नेकपा एमालेका सांसद राजेन्द्र राईले राज्य व्यवस्था समितिको बैठकमा गृहमन्त्री नारायणकाजी श्रेष्ठको राजीनामा मागेका छन् ।

शुक्रबार ललितपुरको बालकुमारीमा २ जनाको ज्यान जाने गरी भएको घटनामा गृहमन्त्री पनि जिम्मेवार भएकाले राजीनामा दिनुपर्ने भन्दै एमालेका सांसद राईले गृहमन्त्री श्रेष्ठको राजीनामा मागेका हुन् ।

उनले भने- ‘युवाले विदेश गएर गरी खान माग गर्दा ताकी ताकी गोली हानेर मार्नुहुन्छ भने तपाईंले राजीनामा नदिए कसले दिन्छ?’ ‘समस्या समाधान गर्ने कि, ठाउँको ठाउँ गोली हानेर मार्न मिल्छ? शालिनतापूर्वक भन्छु तपाईंले मुलुक चलाउन सक्नु भएन राजीनामा दिनुस्।’

छानबिन समितिलाई निष्पक्ष ढंगले काम गर्ने वातावरण बनाउनका लागि भए पनि गृहमन्त्रीले राजीनामा दिनुपर्ने उनले बताए ।

साथै सांसद राईले मन्त्रीका पीएसओ र फिल्ड कमान्डर, डीएसपीलाई कारबाही गरेर नहुने भन्दै आईजी वा गृहमन्त्रीलाई कारबाही हुनुपर्ने बताए।