काठमाडौं । जिल्ला प्रहरी कार्यालय कास्कीले जिप चोरीमा संलग्न एक जनालाई पक्राउ गरेको छ।

पक्राउ पर्नेमा पोखरा महानगरपालिका १४ खाल्टेमसिना बस्ने वर्ष २० का गोविन्द परियार रहेका छन्।

बुधबार विहान अन्दाजी साढे १ बजेको समयमा पोखरा महानगरपालिका–१० अमरसिंह स्कुलको खेल मैदानमा पार्किङ गरी राखेको ग २ च २३४३ नम्बरको बलेरो जिप चोरी भएको भन्ने सूचना प्रहरीलाई प्राप्त भएको थियो।

त्यसलगत्तै वडा प्रहरी कार्यालय रामबजारबाट खटिएको प्रहरी टोलीले गोविन्दलाई उक्त जिप चलाई रहेको अवस्थामा फेला पारेको जनाएको छ।

परियारलाई पक्राउ गरी चोरी तथा डाँका मुद्दामा अदालतबाट ६ दिनको म्याद थप गरेर अनुसन्धान भइरहेको प्रहरीले जनाएको छ।