काठमाडौं। बलिउड अभिनेता सलमान खानलाई धम्की दिने गीतकार सोहेल पाशालाई मुम्बई प्रहरीले पक्राउ गरेको छ ।

प्रहरीले पाशालाई कर्नाटकको रायचुरबाट मंगलबार पक्राउ गरेको हो । नोभेम्बर ७ मा, मुम्बई प्रहरीलाई धम्कीपूर्ण सन्देश आएको थियो । यसमा सलमान र लरेन्समाथि एउटा गीत लेखिएको बताइएको थियो ।

गीत लेख्नेलाई एक महिनाभित्र मारिने र उसको हालत यस्तो बनाइने कि आफ्नै नामबाट गीत लेख्न नसक्ने भनिएको थियो । हिम्मत भए ती व्यक्तिलाई बचाउन पनि सलमान खानलाई धम्की दिइएको थियो । यो धम्की लरेन्स विश्नोई गिरोहबाट आएका ठानिएको थियो । तर अहिले यो धम्की अरू कसैले नभएर गीतकारले दिएको खुलासा भएको छ ।

आफूले सलमानको फिल्म सिकन्दरका लागि लेखेको गीत ‘मै सिकन्दर हूं’ भन्ने गीत चर्चित होस् भन्ने सोहेल चाहन्थे । यसका लागि उनले सलमानलाई धम्की दिएका थिए ।

पाशा युट्यूबर पनि हुन् । धम्की दिन उनले अर्को फोन नम्बरबाट ह्वाट्स एप इन्ष्टल गरेका थिए । फोन नम्बर दर्ता भएको व्यक्तिसम्म प्रहरी पुग्दा उनीसँग सामान्य फोन मात्रै भएको थाहा भयो । फोन चेक गर्दा ह्वाट्स एप इन्टलेशनका लागि नोभेम्बर ३ मा ओटीपी आएको भेटियो । अरू सोधपुछको क्रममा पाशाले बजारमा घुम्दै गर्दा ती मोबाइल धनीसँग फोन मागेर सो नम्बरमा आएको ओटीपीबाट आफ्नो फोनमा ह्वाट्स इन्टल गरेको अनि सलमानलाई धम्की दिएको थाहा भयो ।