काठमाडौं । २३ दिनमै ८ वटा उच्च र कठोर अफ-रोड भूभागहरू पार गरेर इतिहास रचेकाे पिकअप टुनल्यान्ड जि ७ नेपालमा औपचारिक रूपमा सार्वजनिक भएको छ।

नेपालका लागि फाेटाेनकाे आधिकारिक वितरक एमएडब्लू वृद्धिले आइतबार पुलचोकस्थित ‘द प्लाजा’ मा एक समाराेहका बिच याे पिकअप गाडी सार्वजनिक गरेकाे हाे ।

टुनल्यान्ड जि ७ले यसअघि २३ दिनमै ८ वटा उच्च र कठोर अफ-रोड भूभागहरू पार गर्ने विश्वकै पहिलो पिकअपका रूपमा इतिहास रचिसकेको छ। नेपालमा डेब्यु गर्नु अघि यो गाडी १५,००० किलोमिटरको कठिन परीक्षणमा टेस्ट गरिएको थियो।

सार्वजनिक कार्यक्रममा बोल्दै एमएडब्लू वृद्धिका प्रबन्ध निर्देशक विवेक सिकारियाले नेपालमा चुनौतीका वावजुत पनि आफुहरुले फोटोनसँग सहकार्य गर्ने निर्णय लिएकाे र आज त्यो विश्वास सार्थक भएको बताए । ‘पछिल्ला पाँच, छ वर्षमा हामीले नेपालमा १५०० भन्दा बढी फोटोन सवारी साधन बिक्री गरिसकेका छौं, जसमा ५०० भन्दा बढी पिकअपहरू पर्छन्।” उनले भने, “आफ्टर सेल्स सर्भिस र स्पेयर पार्ट्सको मामलामा हामीले कुनै कसर बाँकी राखेका छैनौं। रोकथाम मेनटेनेन्सदेखि एक्सिडेन्टल मर्मतसम्म, जि ७ को मर्मत खर्च बजारका अन्य विकल्पहरूभन्दा २०% कम छ”।

कार्यक्रमपछि टुनल्यान्ड जि ७ पहिल्यै बुकिङ गरेका ग्राहकहरूलाई साँचो हस्तान्तरण गरिएको थियो।

चीनमा अटोनोमस व्यवसायिक सवारी साधन सार्वजनिक गर्ने पहिलो ब्रान्डको रूपमा फोटोनको गौरवशाली इतिहास रहेको छ र आज पनि कम्पनी अत्याधुनिक डिजाइनमा अगाडि रहँदै आएको छ। टुनल्यान्ड जि ७ त्यहि इनोभेसनको सजीव प्रमाण हो।

यो गाडी बलियो र इन्टेलिजेन्सको खोज गर्ने यात्रुहरूको लागि बनाइएको कम्पनीले बताएकाे छ । १६० एचपी पावर र ३९० एनएम टर्कसहित जि ७ ले नेपालको सबै भूभागमा अद्वितीय प्रदर्शन दिन्छ। २२५ मिमीको उच्च ग्राउन्ड क्लियरेन्सका साथ यो गाडी उबडखाबड बाटो, उकालो चढाइ र अनिश्चित हिमाली बाटाहरूलाई आत्मविश्वासका साथ पार गर्न सक्ने कम्पनीकाे दाबी छ।

कम्पनीका अनुसार याे पिकअपकाे भित्री भागमा १२.३ इन्चको इन्फिनिटी स्क्रिन राखिएको छ जसले नेभिगेसन र मनोरञ्जनको आवश्यकता पूरा गर्छ। तातो र चिसो हुने, १२ तरिकाले एडजस्ट गर्न सकिने इलेक्ट्रिक सिटहरू छन् जसले चालक र यात्रुलाई मौसमअनुकूल आरामदायी अनुभव दिन्छ। गाडिमा प्यानोरामिक सनरूफ रहेकाे छ। साथै, यसमा भएकाे अटोमेटिक एयर कन्डिसनिङले जस्तोसुकै मौसममा पनि यात्रालाई सहज बनाउने कम्पनीकाे दाबी छ।

फोटोन टुनल्यान्ड जि ७ तीन फरक भेरियन्टहरूमा उपलब्ध छ। गाडीकाे एलिट भेरियन्टका लागि ५१.९९ लाख, लक्जरीका लागि ६५.४० लाख र फ्ल्यागशिप मोडेलका लागि ६९.९९ लाख रुपैयाँ ताेकिएकाे छ।

४×२ र ४×४ का फरक विकल्पहरूमा उपलब्ध यस गाडीमा बलियो डिजेल इञ्जिन, १०.२५ इन्चको इन्फोटेनमेन्ट सिस्टम, ब्लुटुथ कनेक्टिभिटी, रियर-भ्यू क्यामेरा, डुअल एयरब्याग, एबीएस विथ ईबीडी, हिल होल्ड असिस्ट र इलेक्ट्रोनिक डिफरेन्सियल लक लगायतका विशेष फिचरहरू राखिएका छन्।

टुनल्यान्ड जि ७ ले बलियो प्रदर्शन र परिष्कृत डिजाइनलाई संयोजन गर्दै चुनौतिपूर्ण अफ-रोड र आरामदायी शहरी यात्रा दुवैमा उपयुक्त अनुभव दिने कम्पनीकाे दाबी छ ।