काठमाडौँ । सुनसरीमा कोरोना भाइरस (कोभिड–१९) संक्रमितको संख्या बढेसँगै प्रशासनले आगामी जेठ १५ गतेसम्म जिल्ला भर पूर्ण निषेधाज्ञा गर्ने भएको छ । यसअगाडि निषेधाज्ञालाई सर्वसाधारणले चासो नदिएको भन्दै जिल्ला प्रशासनले नेपाली सेना परिचालन गर्ने निर्णय गरेको छ ।

शनिबारदेखि जिल्लाभर सेना परिचालन गर्ने तयारी गरेको प्रमुख जिल्ला अधिकारी उमेश ढकाल बताए । जिल्लाको धरान उपमहानगरपालिका, इटहरी उपमहानगरपालिका र सदरमुकामसमेत रहेको इनरुवा नगरपालिकामा सेना परिचालन गरिने भएको हो ।

निषेधाज्ञा नियन्त्रण गर्न परिचालन गरिएका सेनाल रचनात्मक तरिकाले भूमिका खेल्ने प्रजिअ बताए । सेनाले मुख्य बजार क्षेत्र, अति भीड हुने स्थान र राजमार्गमा नियमित गस्ती गर्ने भएको हो ।

यसअगाडि वैशाख ३१ गतेसम्म निषेधाज्ञा जारी गरिएको थियो । निषेधाज्ञाको समयमा मेडिकल, एम्बुलेन्स र अति आवश्यकबाहेक सबै सेवा बन्द गर्ने निर्णय गरिएको छ ।