मुस्ताङ। हिउँदयाम मौसमसँगै अत्यधिक चिसोका कारण मुस्ताङका तीन गाउँपालिकामा सञ्चालित शैक्षिक संस्था दुई महिनाका लागि बन्द भएका छन् । यहाँस्थित माथिल्लो मुस्ताङका शैक्षिक संस्था हिउँदयाममा घुम्ती कक्षा संञ्चालन गर्न बेसी झर्छन भने यहाँको तल्लो मुस्ताङ र मध्यमुस्ताङका शैक्षिक संस्थाहरु हिउँदयाममा बन्द हुन्छन् ।

अत्यधिक चिसो बढेसंगै यहाँका तीन पालिकामा सञ्चालनमा रहेका सरकारी सामुदायिक, संस्थागत र गुम्बा विद्यालयमा जाडो छल्न दुई महिनाका लागि हिउँदे बिदा गरेका शिक्षा विकास तथा समन्वय एकाइका कार्यालय प्रमुख रामेश्वर लामिछाने जानकारी दिए ।

उनका अनुसार यहाँस्थित माथिल्लो मुस्ताङका विद्यालय अत्यधिक चिसोका कारण जाडो छल्न कात्तिक अगावै घुम्ती कक्षा चलाउन बेसी झरेको र यहाँको बारागुङ मुक्तिक्षेत्र, घरपझोङ र थासाङ गाउँपालिकाका शैक्षिक संस्था पुस १५ गतेदेखि बन्द भएको छ । एकाइ प्रमुख लामिछानेले बताएअनुसार यहाँको तल्लो क्षेत्रका तीन पालिकाका शैक्षिक दुई महिना जाडो बिदा गरेर फागुनको पहिलो र दोस्रो हप्तादेखि नियमित शैक्षिक पठनपाठन सञ्चालन गरिने छ ।

माथिल्लो मुस्ताङका शैक्षिक संस्थाहरुले विद्यार्थीहरुलाई बेसीको पारिलो स्थानमा राखेर शैक्षिक पठनपाठन सञ्चालन गरिराखेको एकाइ प्रमुख लामिछानेले उल्लेख गरे । यहाँका शैक्षिक संस्थाहरुले हिउँदयामको जाडो मौसममा सम्भावित हिमपात र अत्यधिक चिसोका कारण विद्यार्थीहरुको स्वास्थ्यमा प्रतिकूल असर पु¥याउन सक्ने भएकाले बर्सेनि मुस्ताङका शैक्षिक संस्थाले हिउँदयाममा दुई महिना विद्यालय बन्द गरी विद्यार्थीलाई हिउँदे जाडो बिदा दिने चलन छ ।

बारागुङ मुक्तिक्षेत्र गाउँपालिकाका शिक्षा शाखा प्रमुख रेखा पन्तका अनुसार यहाँ पालिकामा रहेका तीन सरकारी सामुदायिक र एक गुम्बा विद्यालय गरी चार सरकारी तथा गुम्बा विद्यालयहरु अत्यधिक चिसोका कारण दुई महिना अर्थात ६० दिनका लागि हिउँदे बिदा दिने अनुमति प्रदान गरिएको बताए ।

प्रमुख पन्तका अनुसार यहाँका सरकारी विद्यालय पुसको ८ गतेदेखि फागुन ८ गतेसम्मका लागि जाडो बिदा दिने गरी छुसाङ, कागबेनी, र झारकोटमा रहेका शैक्षिक संस्था पूर्ण रुपमा बन्द भइसकेको बनाउनुभयो । यहाँ शिक्षकहरुका लागि सरकारी बिदा ४५ दिन, ५ दिन स्थानीय बिदा र १० दिन सार्वजनिक बिदामा अध्यापन गराएवापत दुई महिना विद्यालय बन्द गर्ने प्रस्ताव स्वीकृत गरिएको उहाँको भनाइ छ । घरपझोङ गाउँपालिकामा सञ्चालनमा रहेका सरकारी सामुदायिक, निजी संस्थागत र गुम्बा विद्यालयहरु अत्यधिक चिसो बढेका कारण दुई महिनाका लागि विद्यालय बन्द गरेको शिक्षा शाखा प्रमुख शिव पुरीले बताए ।

प्रमुख पुरीका अनुसार घरपझोङ गाउँपालिकामा चालु शैक्षिक सत्रको अर्धवार्षिक परीक्षा सकेर पुस १५ गतेदेखि फागुन २० गतेसम्मका लागि विद्यार्थीलाई हिउँदे बिदा दिएको बताए । यहाँ विद्यालयमा विद्यार्थीलाई जाडो बिदा दिएता पनि त यहाँका शिक्षक÷शिक्षिका र शैक्षिक प्रशासन शाखा भने पुस २० गतेपछि मात्रै बन्द हुने शिक्षा शाखा प्रमुख गिरीको भनाइ छ । थासाङ गाउँपालिकाअन्तर्गत शैक्षिक संस्था अत्यधिक चिसोका कारण बन्द भएको त्यहाँका शिक्षा शाखा प्रमुख धर्म खनालले जानकारी दिए ।

यहाँका सामुदायिक निजी र गुम्बा विद्यालयलाई फागुन १ गतेदेखि विद्यालय खुल्ने गरी ४५ दिनका लागि हिउँदे बिदा दिइएको उनको भनाइ छ । योसँगै घुम्ती कक्षा सञ्चालनका लागि बेसी नझरेका मुस्ताङको तीन पालिकाका गरी १९ सरकारी सामुदायिक, निजी र धार्मिक गुम्बा विद्यालय अत्यधिक चिसोका कारण बन्द भएका हुन् ।

यहाँको बारागुङ मुक्तिक्षेत्रमा चार, घरपझोङमा आठ र थासाङ गाउँपालिकामा सात विद्यालय चिसो मौसमका कारण बन्द भएका हुन् । यसअघि माथिल्लो मुस्ताङस्थित लोमान्थाङ गाउँपालिकाका तीन सामुदायिक र चार गुम्बा विद्यालय अत्यधिक चिसोका कारण कात्तिक अगावै साविक स्थानको विद्यालयले छोडेर पोखराका विभिन्न स्थानमा घुम्ती कक्षा चलाइरहेका छन् । माथिल्लो मुस्ताङस्थित लोघेकर दामोदरकुण्ड गाउँपालिकाअन्तर्गत तीन सामुदायिक र दुई धार्मिक गुम्बा विद्यालय जाडो छल्न बेसी झरिसकेका छन् ।