काठमाडौं। इलेक्ट्रिक स्कुटर सहरभित्र छोटो दूरीका लागि मात्र उपयुक्त हुन्छ भन्ने धारणा तोडेको छ । भारतको गोवाबाट आएका दुई उत्साही राइडरहरूले एथर ४५० इलेक्ट्रिक स्कुटरमार्फत नेपालसम्मको महत्त्वाकांक्षी क्रस–कन्ट्री यात्रा सफलतापूर्वक सम्पन्न गरेका छन् ।

आगमन र प्रस्थानसमेत समेटिएको यो यात्रा ६ हजार किलोमिटरभन्दा बढी दूरीको रहेको छ, जसले इलेक्ट्रिक मोबिलिटीको सम्भावनालाई नयाँ स्तरमा पुर्‍याएको कम्पनीको दाबी छ ।

यस ऐतिहासिक यात्रालाई एशिया बुक अफ रेकर्डसमा दर्ता गराउने लक्ष्यसहित दुई महत्त्वपूर्ण कीर्तिमान स्थापित गर्ने योजना बनाइएको छ । ती कीर्तिमानमा एक व्यक्तिद्वारा गरिएको सबैभन्दा लामो इलेक्ट्रिक स्कुटर यात्रा तथा पहिलो पटक सम्पन्न भएको अन्तरदेशीय क्रस–कन्ट्री इलेक्ट्रिक स्कुटर यात्रा समावेश छन् । तर, यो यात्रा केवल कीर्तिमानको सूचीमा नाम लेखाउने उद्देश्यमा सीमित रहेन ।

यो यात्रा प्रविधिमाथिको भरोसा, चार्जिङ पूर्वाधारप्रतिको विश्वास र वास्तविक सडक अवस्थाका लागि भारतमै विकास गरिएको उत्पादनप्रतिको आत्मविश्वासको प्रतीक बनेर प्रस्तुत भएको कम्पनीको दाबी छ ।

९ जनवरीमा भारतको गोवाबाट सुरु भएको यो यात्रा गोवा, गोरखपुर हुँदै नेपाल प्रवेश गर्दै बुटवल, चितवन र अन्ततः काठमाडौंसम्म आइपुगेको थियो । यात्राको क्रममा राइडरहरूले फरक–फरक भू–भाग, लामो राजमार्ग, अन्तरदेशीय सीमा, मौसमको विविधता र वास्तविक चार्जिङ अवस्थाको सामना गरे । ती सबै परिस्थितिमा एथर ४५० ले दिएको प्रदर्शनले प्रत्येक किलोमिटरमा एउटै सन्देश दियो । एथर अब दूरी वा विश्वसनीयताले सीमित छैन।