काठमाडौँ । राष्ट्रियसभाका अध्यक्ष नारायणप्रसाद दाहालले निर्माणाधीन सङ्घीय संसद् भवनको अनुगमन गरेका छन् ।

अनुगमनका क्रममा अध्यक्ष दाहालले राष्ट्रियसभा र प्रतिनिधिसभा हलका साथै विभिन्न संरचनाको अवस्थाका बारेमा जानकारी लिए । प्रतिनिधिसभाको निर्वाचन सम्पन्न भएसँगै संसद् बैठक बस्ने कक्ष तयार नहुँदा मल्टिपर्पोज हललाई तयार गर्न लागिएको छ ।

अध्यक्ष दाहालले प्रतिनिधिसभाका नवनिर्वाचित सदस्यको शपथ ग्रहणका लागि बनिरहेको मल्टिपर्पोज हलको प्रगतिका बारेमा जानकारी लिए ।

सहरी विकास मन्त्रालयका अधिकारीका अनुसार शनिबारसम्म मल्टिपर्पोज हललाई सभाकक्षका रुपमा निर्माण गरिनेछ ।

प्रतिनिधिसभा र राष्ट्रियसभाका बैठक कक्षहरु तयार हुन भने अझै केही समय लाग्ने सहरी विकास मन्त्रालयले जनाएको छ । अनुगमनका क्रममा अध्यक्ष दाहालले नवनिर्वाचित सदस्यहरुको शपथ ग्रहण र त्यसपछि प्रतिनिधिसभाको बैठकका लागि सबै तयारी गर्न निर्देशन दिनुभयो ।