काठमाडौं । केपी ओली नेतृत्वको सरकारले गठन गरेको सुकुम्बासी आयोग खारेज गरेको शेरबहादुर देउवा नेतृत्वको सरकारले भूमि आयोग बनाएको छ ।

मंगलबार बसेको मन्त्रिपरिषद् बैठकले ‘राष्ट्रिय भूमि आयोग, ०७८’ गठन गर्दै आयोगको अध्यक्षमा केशव निरौला र उपाध्यक्षमा महेन्द्र खड्कालाई नियुक्त गरेको हो ।

सरकारले गठन गरेको सुकुम्बासी समस्या समाधान आयोगका अध्यक्ष र उपाध्यक्षले बुधबार सपथ लिएका छन् । अध्यक्ष निरौला र उपाध्यक्ष खड्काले बुधबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा शपथ लिएका हुन् ।

आयोग र अन्य पदाधिकारीका विषयमा भने निर्णय भइसकेको छैन ।

नेपाल शिक्षक संघका पूर्वकेन्द्रीय अध्यक्षसमेत रहेका निरौला कांग्रेसको केन्द्रीय नीति अनुसन्धान तथा प्रशिक्षण प्रतिष्ठानका सदस्य थिए ।

यसअघि केपी ओली नेतृत्वको सरकारले देवी ज्ञवालीको अध्यक्षतामा सुकुम्बासी समस्या समाधान आयोग गठन गरेको थियो । शेरबहादुर देउवा नेतृत्वको सरकारले साउन १९ उक्त आयोग खारेज गरेको थियो ।

सिंहदरवारस्थित प्रधानमन्त्री तथा मन्त्रीपरिषदको कार्यालयमा भएको सपथग्रहणपछि सञ्चारकर्मीसँग कुरा गर्दै अध्यक्ष निरौंलाले सुकुम्वासीका समस्याहरुलाई हटाउने बताए ।

उनले सुकुम्वासी समस्याका नाममा धेरै समयसम्म देशमा जटिलताहरु थपिँदै गएकोले आफ्नो नेतृत्वको टीमले ती समस्याहरुलाई हटाउने प्रयत्न गर्ने बताए ।

सपथग्रहण समारोहमा गृहमन्त्री बालकृष्ण खाँण, कानून, न्याय तथा संसदीय मामिलामन्त्री ज्ञानेन्द्रबहादुर कार्की, उर्जा, जलस्रोत तथा सिँचाईमन्त्री पम्फा भुसाल, मुख्य सचिव शंकरदास वैरागीसहितको उपस्थिति रहेको थियो ।