काठमाडौं । ऊर्जा, जलस्रोत तथा सिँचाइमन्त्री पम्फा भुसालसँग नेपालका लागि संयुक्त अरब इमिरेट्स (युएयी) का राजदूत सईद हम्दन अल–न्वाबी ले शिष्टाचार भेट गरेका छन् ।

सिंहदरवारस्थित उर्जा मन्त्रालयमा भएको भेटमा नेपाल र युएयीबीच रहीआएको अपसी सम्बन्धका विविध पक्षमा छलफल भएको उर्जामन्त्रीको नीजि सचिवालयले जनाएको छ ।

सो अवसरमा राजदूत अल–न्वाबीले आफ्नो कार्यकालमा द्विपक्षीय व्यापार विस्तार हुनुका साथै आपसी सम्बन्ध विस्तारमा थप योगदान पुगेको जानकारी मन्त्री भुसालाई गराएका थिए । उनले आगामी नोभेम्बर १५–१८, २०२१ मा अबुधावीमा हुने ‘इन्टरनेसनल पेट्रोलियम एक्जिविसन एन्ड कन्फ्रेरेन्स’मा मन्त्री भुसाललाई सहभागी हुन युएयी सरकारको निमन्त्रणापत्र हस्तान्तरण गरेका थिए ।

जवाफमा मन्त्री भुसालले अबुधावीमा हुने सम्मेलनमा आफूलाई निमन्त्रणा गरेकोप्रति त्यहाँको सरकारलाई धन्यवाद दिएकी थिइन् ।

उनले सम्मेलनको सफलताको कामना गदैं आफ्नो सहभागिताबारे परराष्ट्र मन्त्रालयमार्फत जानकारी पठाउने बताइन् ।

राजदुतसागको भेटका क्रममा मन्त्री भुसालले रोजगारीका सिलसिलामा दुई लाखभन्दा बढी नेपाली युएयीमा रहेको र उनीहरूले सम्मानजनक सुविधा पाउने विश्वास व्यक्त गरिन् ।

कोभिड-१९ महामारीमा पनि त्यहाँ रहेका नेपालीलाई रेखदेख गरेको भन्दै मन्त्री भुसालले युएयी सरकारप्रति धन्यवाद व्यक्त गरेकी थिइन् ।

नेपालको ऊर्जा, कृषि, पर्यटनलगायत क्षेत्रमा लगानीका लागि उपयुक्त अवसर रहेको उल्लेख गर्दै भुसालले त्यहाँका इच्छुक लगानीकर्तालाई नेपालमा लगानी गर्न आग्रह समेत गरिन् ।

भेटका अवसरमा ऊर्जा मन्त्रालय र परराष्ट्रमन्त्रालयका अधिकारीहरु पनि सहभागी थिए ।