काठमाडौँ । सल्यानमा जिपको ठक्करबाट दुई छात्राको मृत्यु भएको छ । घटनामा अन्य तीन जना सख्त घाइते भएका छन् । जिल्लाको थारमारेबाट श्रीनगरतर्फ आइरहेको लु २ च ५७०१ नंको डबल क्याप जिपले शारदा नगरपालिका ६ बांगे सल्लाको नजिकै सडक छेउमा बसिरहेका पाँच छात्रालाई ठक्कर दिएको थियो ।

ठक्करबाट सख्त घाइते भएकी शारदा नगरपालिका ६ बरला निवासी १८ वर्षीय रेखा बुढाथोकी र सोही ठाउँकी १८ वर्षीय सुनिता नेपालीलाई उपचारका लागि नेपालगञ्ज लाँदै गर्दा मृत्यु भएको प्रहरीले जनाएको छ । घाइते रेखा र सुनितालाई छाती तथा मुखमा गहिरो चोट लागेको र उनीहरुको अवस्था जटिल भएकाले प्राथमिक उपचारपछि थप उपचारका लागि नेपालगञ्ज रिफर गरिएकामा बाटोमै मृत्यु भएको प्रहरीले जनाएको हो ।

घाइते शारदा नगरपालिका ६ बरालाका १८ वर्षीय मीना परियार, १६ वर्षीय सुशिला नेपाली र १८ वर्षीय दीपा बुढाथोकीलाई पनि थप उपचारका लागि नेपालगञ्ज लगिएको छ । शिवजन माविमा कक्षा १२ मा अध्ययनरत छात्राहरू सडकको छेउमा बसिरहेको बेला तीव्र गतिमा रहेको जिप अनियन्त्रित भई दुर्घटना भएको प्रहरी नायब निरीक्षक लीलाराम चन्दले जानकारी दिए ।

जिपमा सवार चार जना भने सकुशल रहेका छन् । जिप सडकभन्दा १० मिटर तल खसेको थियो । दुर्घटनापछि फरार जिप चालक शारदा नगरपालिका ४ निवासी टंकबहादुर वलीलाई नियन्त्रणमा लिएर घटनाको थप अनुसन्धान गरिरहेको प्रहरी जनाएको छ ।