काठमाडौं । चालु आर्थिक वर्षमा बीमा गर्नेको संख्या बढेको छ । चालु आर्थिक वर्षको पहिलो ३ महिनासम्म जारी भएको कुल बीमा गर्नेको संख्या गत आर्थिक वर्षको सोही अवधिको तुलनामा १३.२ प्रतिशतले वृद्धि भई ९७ लाख ४० हजार २ सय ७४ पुगेको अर्थ मन्त्रालयले जनाएको छ ।

मन्त्रालयका अनुसार पछिल्लो १ वर्षमा बीमा कम्पनीबाट जारी बीमालेख संख्या १३ प्रतिशतले बढेको हो । सो बीमालेखमध्ये जीवन बीमालेख वैदेशिक रोजगार बीमालेख सहित ९२.५ र निर्जीवन बीमालेख ७.५ प्रतिशत रहेको छ । गतवर्षको असोज महिनासम्म जीवन बीमालेख ९१.५ प्रतिशत र निर्जीवन बीमालेख ८.५ प्रतिशत रहेको थियो ।

यद्यपी चालु आर्थिक वर्षको सोही अवधिमा वैदेशिक रोजगार बीमालेख संख्यामा ३४.८ प्रतिशतले कमी आएको छ । यस अवधिमा संकलन भएको बीमा प्रिमियम रकम गत आर्थिक वर्षको सोही अवधिको तुलनामा २०.१ प्रतिशतले वृद्धि भई ४७ अर्ब ८७ करोड पुगेको छ । गत आर्थिक वर्षमा उक्त रकम ३९ अर्ब ८६ करोड रहेको थियो । यस अवधिको बीमा प्रिमियम रकममा जीवन बीमा ७९.८ प्रतिशत र निर्जिबन बीमा तर्फको हिस्सा २०.२ प्रतिशत रहेको अर्थमन्त्रालयले जनाएको छ ।