काठमाडौँ । सहिद स्मारक ‘ए’ डिभिजन लिगअन्तर्गत बुधबारको खेलमा हिमालयन शेर्पा र पुलिस क्लवबीचको खेल बराबरीमा टुंगिएको छ । हिमालयन शेर्पा र पुलिसको खेल एक एक गोलको बराबरीमा टुंगिएको हो ।

त्रिपुरेश्वस्थित दशरथ रंगशालामा भएको खेलमा पहिलो मिनेटमा नै हिमालयन शेर्पाका विश्वास श्रेष्ठले गोल गरेका थिए । पहिलो हाफमा एक सून्यको अग्रता लिएको शेर्पाले दोस्रो हाफमा अग्रता कायम राख्न सकेन ।

दोस्रो हाफको ६० औं मिनेटमा पुलिसका लागि सुमन लामाले बराबरी गोल फर्काए ।

पुलिसले दोस्रो हाफमा शेर्पालाई दबाबमा राखे पनि गोल थप्न सकेन भने खेलको अन्तिमतिर ८३ मिनेटमा शेर्पाले पाएको फ्रि किकको सदुपयोग गर्न नसक्दा दुवै टोलीले अंक बाड्न बाध्य भयो ।

शेर्पाका कप्तान विश्वासले दायाँ तर्फबाट प्रहार गरेको फ्रि–किक सोझै पुलिसका गोलकिपर चौधरीले रोकिदिएका थिए ।

बराबरीसँगै सुरुवाती तीन खेलबाट ५ अंक जोडेको पुलिस लिग तालिकाको चौथो स्थानमा उक्लिएको छ । पहिलो खेलमा आर्मीसँग १–१ गोलको बराबरीमा रोकिएको पुलिसले दोस्रो खेलमा जावलाखेल युथ क्लबलाई १–० को नतिजामा पराजित गरेको थियो ।

समान खेलबाट दुई अंक जोडेको हिमालयन शेर्पा भने लिग तालिकाको १२औँ स्थानमा छ । शेर्पाले पहिलो खेलमा संकटा क्लबसँग १–१ गोलको बराबरी खेलेको थियो भने दोस्रो खेलमा मनाङसँग पराजित भएको थियो ।