काठमाडौं । नेपाल प्रहरीले रेड नोटिस जारी गरेको रमेश उप्रेतीलाई दुबई पक्राउ गरी काठमाडौ ल्याइएको छ । इन्टरपोल र दुवई प्रहरीको सहयोगमा साढे ३३ किलो सुन तस्करीका मुख्य आरोपी चूडामणि उप्रेती ‘गोरे’को भाइ रमेश उप्रेतीलाई नेपाल ल्याइएको हो । नेपाल प्रहरीले इन्टरपोलसँगको सहकार्यमा उप्रेतीलाई दुवईबाट काठमाडौ ल्याएको भएपनि अहिलेसम्म प्रहरीले औपचारिक धारणा सार्वजनिक गरेको छैन ।

नेपालमा मुद्धा भई विदेशमा बसेका नेपालीहरुलाई इन्टरपोलको सहयोगमा पक्राउ गरी नेपाल ल्याउने क्रममा उप्रेतीलाई मंगलबार काठमाडौं ल्याएर गौशला वृत्तमा राखेका छ । उनलाई बुधबार विराटनगर पठाउने तयारी भएको प्रहरी स्रोतले जनाएको छ । मोरङको उर्लाबारी नगरपालिका–७ घर भई दुबई बस्दै आएका रमेश ३३ किलो सुन तस्करी मुद्दामा फरार अभियुक्त हुन् । प्रहरीले गोरेलाई पक्राउ गरेपनि उनको भाइलाई भने पक्राउ गर्न सकेको थिएन ।

साढे ३३ किलो सुन तस्करीका सबै अभियुक्तहरुले सफाई पाएका बेला प्रहरीले उनलाई दुबईबाट काठमाडौ ल्याएको हो । उनी पनि अदालतबाट छुट्ने निश्चित जस्तै छ । उनी विरुद्ध ज्यान मुद्धा नभएको र सुन तस्करीको मात्रै मुद्धा भएकाले अदालतले धरौटीमा रिहा गर्ने संभावना रहेको छ । २०७४ माघमा चूडामणि उप्रेती ‘गोरे’ को समुहले दुबईबाट ल्याएको साढे ३३ किलो सुन त्रिभुवन विमानस्थलबाट बाहिरिएपछि लुटपाट भएको थियो । साढे ३३ किलो किलो सुन लुकाएको आरोपमा तस्कर समूहले यातना दिएर सनम शाक्यको हत्या भएपछि मात्रै सो घट्ना बाहिर आएको थियो ।

त्यसबारे सरकारले तत्कालिन गृहमन्त्रालयका सह–सचिव ईश्वरराज पौडेलको नेतृत्वमा विशेष समिति बनाएर अनुसन्धान गरेको थियो । सो छानविन प्रतिवेदनका आधारमा जिल्ला सरकारी वकिल कार्यालय मोरङले ‘गोरे’का दाजुभाइसहित ६३ जनालाई मुद्धा दायर गरेको थियो । सुन तस्करी प्रकरणमा प्रमाण अभाव भएको भन्दै जिल्ला अदालतले सबैलाई सफाई दिइसकेको छ । अहिलेसम्म सुन तस्करीको मात्रै आरोप लागेका व्यक्तिहरु भने जेलमा छैनन । ज्यान मुद्धा लागेका मात्रै जेलमा रहेका छन् । अदालतले डायरीमा टिपोट गरेको विषयलाई प्रमाणको आधार मान्न नसकिने जनाएको थियो ।