काठमाडौं । नेपाल पत्रकार महासंघले कोभिड–१९ संक्रमणको दोस्रो लहरबाट उत्पन्न हुन सक्ने समस्याका बारेमा पूर्व तयारी गर्न दुई छुट्टाछुट्टै समिति गठन गरेको छ । महासंघको आज बसेको पदाधिकारी बैठकले त्यस्तो निर्णष्य गरेको बैठक पछि महासंघका महासचिव रोशन पुरीद्दारा जारी विज्ञेप्तीमा उल्लेख छ ।

महासंघले कोभिड–१९ को दोस्रो लहरको ले सञ्चार क्षेत्रमा पार्ने समस्याको समग्र विषयको अनुगमन तथा समन्वय गर्न वरिष्ठ उपाध्यक्ष रमेश विष्टको संयोजकत्वमा उपाध्यक्षद्वय बाला अधिकारी, उदय जिएम, सचिवहरु पवन आचार्य र नारायण सुन्दर किलम्बुका साथै प्रदेशबाट निर्वाचित केन्द्रीय सदस्यहरु रहेको समिति गठन गरेको छ ।

त्यस्तै कोभिड–१९ को दोस्रो लहरको प्रभावबाट प्रेस स्वतन्त्रता, श्रमजीवी पत्रकार तथा सञ्चारगृहमा उत्पन्न हुनसक्ने समस्याको समाधान र समन्वय गर्न महासचिव रोसन पुरीको संयोजकत्वमा सचिव गोविन्द चौलागाईँ, लेखा समिति संयोजक लेखनाथ न्यौपाने, कोषाध्यक्ष कलेन्द्र सेजुवाल, केन्द्रीय सदस्यहरु रामकृष्ण अधिकारी, मणि दाहाल, शन्तराम बिडारी, विकास कार्की र कृति भट्टराई सदस्य रहेको अर्काे समिति समेत गठन गरेको छ ।

महासंघले कोभिड–१९ को दोस्रो लहरबाट जोगिदैँ स्वास्थ्य सुरक्षालाई पहिलो प्राथमिकतामा राखेर मात्रै पेशागत कर्तव्य पूरा गर्न आम सञ्चारकर्मीलाई आग्रह गरेको छ । सञ्चारगृहलाई पनि कार्यरत सञ्चारकर्मी र कर्मचारीका लागि स्वास्थ्य सतर्कतामा विशेष ध्यान दिई काम गर्ने वातावरण मिलाउन आग्रह गरेको छ ।

समाचारकक्षमा सामाजिक दूरी कायम गर्ने, सकभर घरबाटै काम गर्ने वातावरण मिलाउने, पर्याप्त स्वास्थ्य सामग्रीको व्यवस्थापन गर्र्न र प्रविधिको उच्चतम प्रयोग गरेर सुरक्षित वातावरण निर्माण गर्न सञ्चार प्रतिष्ठानलाई महासंघ आग्रह गरेको छ ।