काठमाडौं । आज चौथो राष्ट्रिय सूचना तथा सञ्चार प्रविधि दिवस मनाईंदैछ ।

दिवसको अवसरमा सञ्चार तथा सूचना प्रविधि मन्त्रालयले भर्चुअल कार्यक्रमको आयोजना गरेको छ । मन्त्रालयका अनुसार विहान ११ बजे प्रधानमन्त्री केपी शर्मा ओलीले उक्त कार्यक्रमलाई सम्बोधन गर्नेछन् ।

दिवसकै अवसरमा प्रधानमन्त्री ओलीले शुभकामना सन्देश जार गरेका छन् । प्रधानमन्त्री ओलीले शुभकामना सन्देशमा डिजिटल प्रविधीको उपयोगबाट सेवा प्रवाह, उत्पादन र उत्पादकत्व अभिबृद्धि गरी अर्थतन्त्रका बृहत्तर आयामहरुको रुपान्तरण गर्न सकिने उल्लेख गरेका छन् ।

यस्तै ओलीले सूचना प्रविधीको क्षेत्रमा लगानीको वातावरण सुधार गर्न, ज्ञानमा आधारित समाज तथा डिजिटल अर्थतन्त्रका आधार निर्माण गर्न, सूचना प्रविधी सम्वन्धी डाटा सुरक्षित बनाउन तथा सुलभ र विश्वसनीय रुपमा सेवा उपलब्ध गराउन प्रविधी क्षेत्रसँग सम्वन्धित सबैलाई आग्रह गरेका छन् ।

सरकारका प्रवक्ता समेत रहेका सञ्चार तथा सूचना प्रविधिमन्त्री पार्वत गुरुङले पनि शुभकामना सन्देश जारी गरेका छन् ।

मन्त्री गुरुङले आधुनिक युुगको मागअनुसार हरेक क्षेत्रलाई सूचना तथा सञ्चार प्रविधिसँग जोड्दै “समृद्ध नेपालः सुुःखी नेपाली”को राष्ट्रिय संकल्पलाई पूरा गर्नेतर्फ सरकारले लक्ष्य लिएको जानकारी दिए ।

मन्त्री गुरुङले सूचना प्रविधि मैत्री नेपाल निर्माणका लागि सरकारले अनलाइनबाटै सबै सरकारी सेवा नागरिकलाई प्रदान गर्न ‘नागरिक एप’ सञ्चालनमा ल्याएको उल्लेख गरेका छन् । सूचना प्रविधि क्षेत्रको दुरुपयोग हुन नदिन तथा सूचना प्रविधि क्षेत्रको विकासमा सहज पहुुँच पुर्‍याउन सरकारले संसदमा ‘सूचना प्रविधि विधेयक’ पेश गरेको गुरुङले उल्लेख गरेका छन् ।

‘सूचना महामार्ग’ निर्माण र विस्तारको कामलाई प्राथमिकताका साथ अघि बढाइएको, सबै स्थानीय तह, वडा कार्यालय, सामुदायिक शिक्षण संस्थाहरु, स्वास्थ्य केन्द्रसम्म सूचना प्रविधि पूर्वाधारको पहुुँच सुनिश्चत गर्ने र ती स्थानहरुमा ब्रोडब्यान्ड इन्टरनेट सेवा पुर्‍याउनेको लागि पनि बजेटको व्यवस्था गरेको भन्दै मन्त्री गुरुङले सूचना प्रविधिको क्षेत्रमा नेपालले ठूलो फड्को मारिसकेको बताएका छन् ।

प्रत्येक स्थानीय तहमा सूूचना प्रविधि केन्द्र स्थापना र सञ्चालन गर्ने गरी नीति, कार्यक्रम र बजेटको व्यवस्था गरेको छ ।

दूर सञ्चार सेवालाई गुुणस्तरीय बनाउन फाईभ जी परीक्षणको काम अगाडि बढाइएको र साइबर अपराध नियन्त्रण, साईबर सुरक्षा र सरकारी डाटा सेन्टरको सुरक्षा अतिसंवेदनशील विषय भएकाले यसको सुरक्षामा विशेष ध्यानदिइएको उनले बताएका छन् ।