फुङ्लिङ । प्रदेश १ का आर्थिक मामिला तथा योजनामन्त्री टङ्क आङ्बुहाङले १५ लाख रुपैयाँसहित १० शैय्या र पीपीइलगायतका सामग्री ताप्लेजुङका लागि पठाएका छन् । आइसोलेशन निर्माण तथा सञ्चालन गर्न सो रकम पठाइएको हो ।

कोभिड–१९ नियन्त्रण लागि तत्कालका लागि प्रदेश १ को सामाजिक विकास मन्त्रालयमार्फत १५ लाख रुपैयाँ पठाएको मन्त्री आङ्बुहाङका स्वकीय सचिव नारद गुरागाईंले जनाकारी दिए ।

स्टेन, टुलबक्सलगायत १० थान शैय्यासमेत मन्त्री आङ्बुहाङले ताप्लेजुङका लागि पठाएका छन् । यससँगै २०० थान पीपीइ सेट, ३०० थान स्वाब सङ्कलन गर्ने कीटबक्स, ४५ थान थर्मलगन तथा मास्क र स्यानिटाइजरसहितका सामग्री ताप्लेजुङका लागि पठाइएको गुरागाईंले जनकारी दिए ।

स्वास्थ्य सामग्री आज ताप्लेजुङको सदरमुकाम फुङ्लिङ पुग्ने गुरागाईंले बताए । ताप्लेजुङसहित प्रदेश १ का हिमाली जिल्लाका लागि पीसीआर परीक्षण मेसिनसमेतको खोजी भइरहेको गुरागाईंले जानकारी दिए । (रासस)