काठमाडौँ । सत्तारुढ दल नेकपा एमालेका अध्यक्ष केपी शर्मा ओली र वरिष्ठ नेता माधव कुमार नेपालबीच हुने भनिएको भेट रोकिएको छ । एमाले स्रोतका अनुसार दुई नेताबीच एमाले पार्टी मुख्यालय बबरमहलमा निर्णायक वार्ता हुने जनाएको थियो ।

यसअघि आज ११ बजे पार्टी कार्यालय बबरमहलमा दुई नेताबीच भेट्ने कुरा सञ्चारमाध्यममा आएपछि ठूलो संख्यामा पत्रकारहरू एमाले पार्टी कार्यालय पुगेका थिए । तर, घण्टाैँ कुर्दा पनि कार्यालयमा कोही नेता नआएपछि पत्रकार फर्किन थालेका छन् । एमाले नेता सुवास नेम्वाङसँग यस विषयमा बुझ्न खोज्दा उनले भने, ‘दुर्ई नेताबीच वार्ता हुने भनिएको छ, तर कहाँ र कति खेर हुने भन्ने कुनै टुंगो लागेको छैन ।’

ओली र नेपालबीच बिहीबार पनि भेटवार्ता हुने भनिएको थियो । तर, कहाँ भेट्ने भन्ने विषयमा कुरा नमिल्दा भेट हुन सकेको थिएन । बिहीबार अध्यक्ष ओली र नेता नेपालले राष्ट्रिपति विद्यादेवी भण्डारीलाई भेटेका थिए ।

एमालेमा गत फागुन २७ गतेदेखि विवाद हुँदै आएको छ । यसैबीच आगामी २७ गते प्रधानमन्त्री ओलीले प्रतिनिधिसभामा विश्वासको मत लिने बताएपछि पार्टीका शीर्ष नेताहरूको भेटघाट बढ्दै गएको हो ।