काठमाडौँ । कोरोना भाइरस (कोभिड–१९) महामारीका बीच पछिल्लो समय बजार अुनगमन बढेसँगै दैनिक प्रयोग हुने तरकारी तथा फलफूलको मुल्य घटेको छ । कालीमाटी फलफूल तथा तरकारी बजार विकास समितिले आज आइतबार सस्तो भएको तरकारी र फलफूलको मूल्य सूची सार्वजनिक गरी सर्वसाधारणलाई जानकारी दिएको छ ।

समितिका अनुसार रातो आलु प्रतिकिलो ३६ रुपैयाँ ५० पैसा कायम भई कारोबार भएको छ । त्यसैगरी लोकल काक्रो प्रतिकिलो ४५ रुपैयाँ, कागती २ सय १० रुपैयाँ, खुर्सानी सुकेको ३ सय ३० रुपैयाँ कायम भई कारोबार भइरहेको समितिका कार्यकारी निर्देशक विनोद भट्टराईले जनाएका छन् ।

सर्वसाधारणको मागलाई ध्यान दिँदै तरकारी तथा फलफूल जस्ता खाद्य वस्तु बिक्री वितरण गर्न कालिमाटी फलफूल तथा तरकारी व्यवसायी समितिले मनोमानी गर्न पाउने छैनन् । जसअनुसार फलफूलमा हरियो अंगुरको मूल्य प्रतिकेजी २ सय २५ रुपैयाँ, अम्बा १ सय ९५ रुपैयाँ कायम भई कारोबार भइरहेको छ । दुई दिन पानी परेकाले उत्पादनमा राहत भएकाले मूल्य सूची सार्वजनिक गरी सहजकता ल्याएको समितिका निर्देशक भट्टराईले दाबी गरे ।

अहिले कालिमाटी तरकारी बजारमा ६० प्रतिशत नेपाली उत्पादन र ४० प्रतिशत भारतीय उत्पादन आउने गरेको छ । बोडी, सिमी, घिरौला, लौकालगायत सिजन तरकारीहरू नेपालमा उत्पादन भई आएका छन् भने भारतबाट माछा, कागती, आलु र प्याज आउने गरेका छन् । समितिले स्थानीय तहसँगको समन्वयनमा जुनसुकै समयमा कालिमाटीमा तरकारी ल्याउन सक्ने व्यवस्था मिलाएको छ । निषेधाज्ञा सुरु भए पनि बजारमा तरकारी तथा फलफूलको मूल्य बढी नहाल्ने सरकारले जनाएको छ ।

यसैबीच सरकारले कोभिड–१९ रोकथामका लागि काठमाडौँ उपत्यकामा निषेधाज्ञा जारी गरेपछि उपत्यकाको ठूलो तरकारी बजार कालिमाटी तरकारी बजारको कारोबारमा समेत गिरावट आएको छ । निषेधाज्ञा जारी हुनुभन्दा अघि दैनिक झण्डै ९ सय ५० मेट्रिक टन तरकारी भित्रिने गरेको कालिमाटीमा अहिले ४ देखि ५ सय मेट्रिक टन मात्रै तरकारी आउने गरेको छ ।

याे पनि पढ्नुहाेस्

लकडाउनमा खाद्यान्नको मूल्यवृद्धि स्वभाविक, तर अनुगमनमा शंका नगरौं