काठमाडौं । कोरोना नियन्त्रणमा सरकारले काम गर्न नसकेको आरोप लगाईरहेका प्रतिपक्षी दलहरुले सरकारलाई दवाव वढाउने भएका छन् । कांग्रेस सभापति शेरवहादुर देउवाले विहिवार नै पदाधिकारी सहित प्रधानमन्त्रीलाई सिंहदरवारमै पुगेर ध्यानाकषर्ण गराएकै दिन माओवादी केन्द्रले पनि पार्टीका तर्फबाट सरकारलाई ज्ञापनपत्र बुझाउने निर्णय गरेको छ ।

प्रधानमन्त्री ओलीलाई भेटेरै सरकारको कमजोरीमाथी प्रश्न उठाउने गरी माओवादी केन्द्रकै अध्यक्ष पुष्पकमल दाहाल (प्रचण्ड) ओली भेटन जाने भएका छन् ।

विहिवार पेरिसडाँडामा बसेको माओवादी स्थायी समिति बैठकले उपप्रधानमन्त्री इश्वर पोखरेल नेतृत्वमा रहेको सीसीएमसी खारेज गर्न माग गर्ने निर्णया पनि लिएको छ ।

सीसीएमसी संवैधानिक नभएकाले खारेजीको माग गर्ने निर्णय गरेको बैठकपछि स्थायी समिति सदस्य वर्षमान पुन (अनन्त)ले जानकारी दिए ।

सरकार कोभिड–१९ लगायतको स्वास्थ्य सामग्री खरिद गर्दा भष्ट्राचारमा लिप्त भएको, कोरोना नियन्त्रणमा असफल भएकोलगायत विषय समेटेर माओवादीले ओलीलाई भेटेर ज्ञापन पत्र वुझाउने निर्णय भएको पनि पुनले बताए ।

पार्टीका सबै पंक्तिलाई कोरोना नियन्त्रण तथा रोकथामका लागि परिचालित हुन निर्देशन दिने निर्णय पनि माओवादीले गरेको छ । पार्टीका तर्फबाट यसका लागि बनाउने नीति भने भोलि शुक्रवार पत्रकार सम्मेलन गरेर सार्वजनिक गर्ने पनि पुनले बताए ।

कोरोना विरुद्ध जवस, मोर्चा , पार्टीका कमिटिलाई कोरोना विरुद्धको अभियानमा परिचालन गर्ने पनि माओवादीले जनाएको छ ।

कोरोनाको नाममा भएको भ्रष्टाचारको भण्डाफोर गर्ने पनि उसको निर्णय छ ।