काठमाडौं । कोरोनाविरुद्धको भेरोसेल दोस्रो मात्राको खोप अभियान सञ्चालन भइरहेको छ । निषेधाज्ञाकैबीचमा उपत्यकामा खोप दिन सुरु गरिएको हो । वैशाख दुई गतेदेखि काठमाडौं, ४ गतेदेखि भक्तपुर र ६ गतेदेखि ललितपुरमा भेरोसेलको दोस्रो मात्रा दिन थालिएको छ ।

पहिलो मात्रा भेरोसेल खोप लगाएका धेरै जना निषेधाज्ञाअघि नै आफ्नो गाउँँ फर्किएका छन् । कोरोनाविरुद्धको भेरोसेल खोपको पहिलो मात्रा लगाएर दोस्रो मात्रा लगाउन उपत्यकामा नभएका व्यक्तिले तत्काल स्थानीय तहमा नाम टिपाउन स्वास्थ्य जनसंख्या मन्त्रालयले अनुरोध गरेको छ ।

काठमाडौं बाहिर भएकाहरुले भेरोसेलको खोपको दोस्रो मात्रा लगाउनुपर्ने व्यक्तिहरुले आफ्नो स्थानीय तहका स्वास्थ्य संयोजकमार्फत जिल्ला स्वस्थ्य कार्यालयहरूमा नाम र विवरण टिपाउन स्वास्थ्य मन्त्रालयका सहप्रवक्ता समीरकुमार अधिकारीले जानकारी दिए ।

दोस्रो मात्रा खोप लगाउनेहरुको विवरणसहितको सूची तयार भएपछि प्रदेशको समन्वयमा खोप लगाउने मिति र स्थान तोकिने स्वास्थ्य मन्त्रालयले जनाएको छ । निषेधाज्ञाको समयमा अनावश्यक रुपमा पास खोज्दै हिँडडुल नगर्न समेत मन्त्रालयले आग्रह गरेको छ । भेरोसेल खोप पहिलो मात्रा लगाएको ८ देखि १२ हप्तामा दोस्रो मात्रा खोप लगाइसक्नु पर्ने बताईएको छ । यो खोप पहिलो मात्रा करिब २ लाख ९० हजार जनाले लगाएका थिए ।