काठमाडौँ । नेपाल कम्युनिष्ट पार्टी (मसाल)का महामन्त्री मोहन विक्रम सिंहलाई कोरोना भाइरस (कोभिड–१९) पुष्टि भएको छ । पार्टीका नेता तथा सांसद दुर्गा पौडेलका अनुसार उनलाई गत वैशाख २४ गते कोरोना पुष्टि भएको हो ।

कम्युनिष्ट आन्दोलनको हस्तीका रुपमा रहेका महामन्त्री सिंहलाई कोरोना पुुष्टि भएपछि धुम्बराहीस्थित ह्यास अस्पतालमा भर्ना गरिएको थियो । अस्पतालमा उपचारारत उनको स्वास्थ्यमा कुनै सुधार नभएपछि गत ६ गते घर ल्याइएको नेता पौडेलले जानकारी दिइन् ।

‘कोरोना पुष्टि भएको १९ दिन भयो, ह्यास अस्पतालमा भर्ना गरी उपचार गरिए पनि स्थास्थ्यमा खासै सुधार हुन सकेन, त्यसपछि घरमा ल्याएका छौँ,’ नेता पौडेलले भनिन्, ‘उहाँको स्वास्थ्य अवस्था कमजोर भएकाले राम्रोसँग बोल्न सक्नु हुन्न, अहिले पनि कोरोना पोजेटिभ नै देखाएको छ ।’