बाजुरा । जिल्लाको स्वामीकार्तिक खापर गाउँपालिका–३ जुकोटमा गएराति पहिरो खस्दा पाकेको गहुँबाली बगाएको छ ।

अविरल वर्षाका कारण पहिरो गएपछि गहुँ, जौ बाली बगाएको हो । अविरल वर्षाले वाइकुलो नजिकै पहिरो बगेपछि गहुँ, जौ बालीमा पूर्णरुपमा क्षति पुर्‍याएको त्यहाँका स्थानीयवासीले बताएका छन् ।

वर्षाले घट्टेखोलाबाट वाइसम्मको सिंचाइ कुलोमा पानीको बहाव बढेपछि कुलोमुनिबाट पहिरो बगेको स्थानीयवासीको भनाइ छ । पहिरोले पाकेको गहुँबाली बगाएपछि किसान चिन्तित भएका छन् ।

बाली भित्र्याउने समयमा भित्र्याउनै नपाई पहिरोले बगाएपछि किसानलाई भोकमरीको चिन्ता बढेको छ । उक्त स्थानका करिब २० परिवारको गहुँ, जौ बालीमा क्षति पुर्‍याएको स्थानीयवासीले बताएका छन् ।

वर्षा नरोकिए पहिरो पुनः जाने सम्भावना बढेको छ । २० घर पहिरोको उच्च जोखिममा रहेको स्थानीयवासी मेघराज शाहीले जानकारी दिए ।

उनका अनुसार गाउँमाथि रहेको खेतबारीमा पाकेको गहुँ, जौलगायत बाली नष्ट पारिसकेको र अझै वर्षा नरोकिए पहिरो गएर घर बगाउने जोखिम रहेको शाहीको भनाइ छ ।

पहिरोको उच्च जोखिममा रहेका घरपरिवारलाई तत्काल घर खाली गरी सुरक्षित स्थानमा बस्न लगाइएको छ ।