काठमाडौँ । काठमाडौँ उपत्यकामा जारी निषेधाज्ञा थप ११ दिन लम्ब्यिने भएको छ । ललिपुरका प्रमुख जिल्ला अधिकारी (सिडिओ) ढुण्डी प्रसाद निरौलाका अनुसार उपत्यकामा फैलिएको कोरोना भाइरस (कोभिड–१९) नियन्त्रण गर्न थप निषेधाज्ञा लम्बाउने भएको हो ।

मंगलबार दिउँसो उपत्यकाका ३ जिल्लाका सिडिओबीच निषेधाज्ञाका बारेमा छलफल भएको थियो । छलफलमा आगामी निषेधाज्ञा केही खुकुलो हुने बारेमा निर्णय गर्ने तय भएको सिडिओ निरौलाले जानकारी दिए ।

थप हुने निषेधाज्ञामा खाद्यान्न, किराना पसल, डिपार्टमेन्ट स्टोर, अनलाइन डेलीभरी, किताब पसलका साथै बैंक तथा वित्तीय संस्था पूर्ण रूपले खुल्ने गरी सहमति भएको छ । यस्तै, उद्योग, निर्माण कार्य सुरक्षित ढंगले काम गर्न पाइने, ढुवानी सामग्री राति ९ बजेदेखि बिहान ४ बजेसम्म सञ्चालन गर्न पाउने गरी मोडालिटी तयार गरेको हो ।

कोरोना संक्रमण दर तीव्र गतिमा बढेसँगै गत वैशाख १६ गतेदेखि काठमाडौँ उपत्यकामा निषेधाज्ञा भएको थियो । यसअघि थपिएको एक साताको निषेधाज्ञामा खाद्यान्नको पसलसमेत बन्द गर्ने निर्णय भएको थियो ।

काठमाडाैँ उपत्यकामा निषेधाज्ञा थपिएको विषयमा बुधबार दिउँसो तीनै जिल्लाका सिडिओहरूबीच भर्चुअल बैठक बसेर मात्रै निर्णय सार्वजनिक गर्ने तयारी रहेको छ ।