काठमाडौं । दक्षिण कोरिया सरकारले कोभिड–१९ महामारीविरुद्ध लड्न नेपाललाई स्वास्थ्य सामग्री उपलब्ध गराएको छ । कोरियाले पठाएको ३६० थान अक्सिजन कन्सनट्रेटर आज नेपालले आइपुगेको छ ।

नेपालका लागि गणतन्त्र कोरियाका राजदूत पार्क चोंग सुकले स्वास्थ्य तथा जनसंख्या मन्त्रालयका स्वास्थ्य विशषेज्ञ रोशन पोखरेललाई त्रिभुवन अन्तर्राष्ट्रिय विमानस्थलमा हस्तान्तरण गरेका हुन् ।

हस्ताक्षर कार्यक्रममा राजदूत सुकले दक्षिण कोरिया सरकारले आकस्मिक सहयोगका लागि २ लाख अमेरिकी डलर बराबरको स्वास्थ्य साम्रगी सहयोग गरेको र आगामी दिनमा थप सहयोग गर्ने प्रतिबद्धता जनाए ।

उनले कोरोना महामारी नियन्त्रणका लागि नेपाललाई जस्तोसुकै सहयोग गर्न पनि कोरिया तयार रहेको बताए ।

कोरोना नियन्त्रणका लागि गणतन्त्र कोरियाले गतहप्ता तत्काल दुई लाख अमेरिकी डलर बराबरको स्वास्थ्य साम्रगी सहयोग गर्ने जनाएको थियो । राष्ट्रिय समन्यव परिषद् दक्षिण कोरियाको पहलमा उक्त स्वास्थ्य सामग्री प्राप्त भएको परराष्ट्र मन्त्रालयले जनाएको छ ।