काठमाडौँ । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले आफूप्रति लक्षित गर्दै प्रधानमन्त्री एवं एमालेका अध्यक्ष केपी शर्मा ओलीले तत्कालीन नेकपाको एकता भंग गरेको आरोपको निन्दा गरेका छन् ।

ओलीले आफू एकता पक्षधर भएको र अदालतले एमाले र माओवादीको एकता भंग गरेको नभई प्रचण्डले अरूची देखाएकाले भंग भएको भन्दै एमालेका नेता माधव नेपाल पक्षलाई एकतामा आउन आइतबार ६ बुँदे प्रतिबद्धता जनाएका थिए ।

ओलीले अदालतले नेकपाको नाम फेरेर आउन भनेको तर, त्यस सम्बन्धमा आफूले पहलकदमी लिन खोज्दा प्रचण्डले अरूची देखाएकाले एकता नभएको उल्लेख गरेका थिए ।

ओलीको अभिव्यिक्त आएपछि प्रचण्डले उनको अभिव्यक्तिको कडा शब्दमा टिप्पणी गरेका हुन् । प्रचण्डले माधव नेपालसँग उनकै निवासमा पुगेर आफ्नो कारणले के नेकपाको एकता नजोगिएको हो र ? केपी जीको यो वक्तव्यको सार के हो भन्दै जिज्ञासा राखेका थिए ।

लगत्तै उनले आफ्नो सामाजिक सञ्जालमार्फत ओलीको त्यस प्रकारको अभिव्यिक्तको खण्डन गरेका हुन् । उनले भनेका छन्, ‘प्रधानमन्त्री केपी शर्मा ओलीले प्रचण्डको कारण एकताको प्रयास सफल नभएको भन्ने भनाई झुठ, भ्रामक र षड्यन्त्रपूर्ण छ । त्यस प्रकारको अभिव्यक्तिको घोर निन्दा र भर्त्सना गर्दछु ।’