काठमाडौँ । बलिउड चलचित्र ‘ओ माई गड २’मा विवाहपछि यमी गौतमले अभिनय गर्ने भएकी छन् । अक्षय कुमार अघिल्लो पार्टमा भगवानको भूमिकाको जस्तै २ मा पनि भगवानकै पात्रमा देखिने छन् ।

फिल्ममा अक्षय र पंकज त्रिपाठी अनुबन्ध भएपछि अभिनेत्रीको खोजीमा रहेको निर्माण टिमले गौतमलाई छानेको हो । केही दिनअघि निर्देशक आदित्य धरसँग विवाह गरेकी उनको फिल्ममा महत्त्वपूर्ण रोल रहेको बताइएको छ ।

पहिलो भागमा एक व्यक्तिको भगवानसँगको लडाईं देखाइएको थियो । अब फिल्मको कहानीमा ट्विस्ट दिँदै तीन चरित्रलाई लिडमा राखिएको छ । यमी पहिलोपटक अक्षय कुमारसँग काम गर्नका लागि निकै उत्साहित छिन् । फिल्ममा आफ्नो चरित्र मन परेपछि उनले तुरुन्तै काम गर्न स्वीकृति जनाएकी थिइन् ।

सन् २०१२ मा रिलिज भएको सुपरहिट चलचित्र ‘ओ माई गड’ को आउँदो सेप्टेम्बरबाट छायांकन सुरु हुने हिन्दी समाचारमाध्यमले जनाएका छन् । ‘ओ माई गड’लाई उमेश शुक्लाले निर्देशन गरेका थिए भने दोस्रोपार्टमा निर्देशन अमित रायले गर्ने भएका छन् । फिल्मको डेढ वर्षदेखि स्क्रिप्टमा काम भइरहेको निर्माता पक्षले जनाएको छ ।