काठमाडौँ । नेपाली कांग्रेसका प्रवक्ता विश्वप्रकाश शर्माले गण्डकी प्रदेशका नव नियुक्त मुख्यमन्त्री कृष्णचन्द्र नेपाली पोखरेललाई शुभ कामनासहित सुझाव दिएका छन् । उनले शासकीय जिम्मेवारी काँधमा आइपुगेकाले राम्रो काम गरी, राम्रो बन्न मुख्यमन्त्रीलाई सुझाव दिएका हुन् ।

प्रवक्ता शर्माले कोरोना भाइरस (कोभिड–१९) महामारीबाट गण्डकीमा अक्सिजन नपाएर मृत्यु भएका र सुत्केरी भई अस्पताल भर्ना भएकी महिलासहित शिशुको उपचारमा खर्च अभाव भएपछि निकालिएको घटना स्मरण गर्दै आगामी बजेट बनाउन सुझाव दिएका हुन् । उनले यी घटनाहरू प्रतिनिधि भएकाले प्रदेशमा यस्ता समस्याको समाधान हुने बजेट ल्याउन मुख्यमन्त्री पोखरेलसँग आग्रह गरेका हुन् ।

‘समय संवेदनशील छ, राम्रो सावित हुन धेरै राम्रो गर्नुपर्छ, आलोचित हुन एक गल्ती या एउटा भ्रम काफी हुन्छ, त्यसैले छायाको होइन ऐनाको सुझाव लिनुहोस्,’ उनले भनेका छन्, ‘हेक्का रहोस् तपाईको कर्मसँग पार्टीको आगामी छवि गाँसिन्छ, तर, नभुल्नुहोस् संसदीय दलको नेता एउटा पार्टीको हुन्छ, मुख्यमन्त्री सबैको, प्रदेश सरकारको औचित्य स्थापित गर्ने अवसरलाई सकारात्म सन्देशले प्राण भर्नुहोस् ।’

उनले मुख्यामन्त्रीलाई सही निर्णयसहित इमान, पारदर्शिता र नम्रतालाई केन्द्रमा राख्न सुझाव दिएका छन् ।