काठमाडौं । पेट्रोल पम्पमा कार्यरत मजदुरहरुलाई खोपको ब्यवस्था सरकारले तत्काल नगरे पेटोल पम्पहरुले भोलिदेखि तेल नउठाउने चेतावनी सरकारलाई दिएका छन् । कोभिडका कारण सबैभन्दा बढी यस क्षेत्रमा काम गर्ने मजदुरहरु प्रभावित हुने भएकाले सरकारले प्राथमिकतामा राखेर खोप उपलब्ध गराउनु पर्ने उनीहरुको माग छ ।

आयल निगमले एक पक्षीय निर्णय गरेर ट्यांकर चालकलाई मात्र खोप दिन लागेको भन्दै पम्प व्यवसायीहरूले तेल खरिद नगर्ने चेतावनी सरकारलाई दिएका हुन । नेपाल पेट्रोलियम डिलर्स राष्ट्रिय एशोसिएसनले पनि इन्धन ढुवानी गर्ने कर्मचारीलाई खोपको व्यवस्था नभए पेट्रोलियम ढुवानी बन्द हुन सक्ने चेतावनी दिएको छ ।

खोप उपलब्धताका लागि पटक-पटक आयल निगम र उद्योग, वाणिज्य तथा आपूर्ति मन्त्रालयसँग माग गरेपनि हालसम्म पेट्रोलिय व्यवसाय क्षेत्रमा खोप उपलब्ध हुन नसकेको व्यवसायीहरूले बताएका छन्।

एसोसियसनले दिएको तथ्यांक अनुसार देशभर १० हजार ३ सय ४६ जना मजदुर पेट्रोलियम पम्पमा संलग्न रहेकाले सोही संख्या बराबर खोप आवश्यक छ।

बागमती पेट्रोलियम डिलर्स एसोसियसनका अध्यक्ष अचुत खड्काका अनुसार, बुधबारदेखि नै पेटोल पम्पहरुले तेल खरिद नगर्ने निर्णय लिएका हुन् । ‘हामीसँग तेल कम छ । पम्प बन्द हुँदैन, बाँकी भएको तेल बेच्छौं । तर भोलिदेखि तेल खरिद गर्दैनौं’ खड्काले भने ।

खोपको व्यवस्था नभएको भन्दै ट्यांकर चालकले आइबारदेखि इन्धन ढुवानी रोकेका थिए। तीन दिनदेखि पम्पमा तेल आपूर्ति नहुँदा मौज्दात सकिँदै गएको छ । पेटोलपम्पमा काम गर्ने मजदुरले खोप लगाउन नपाए खरिद प्रक्रिया नै रोकेपछि तेलको हाहाकार हुन सक्ने देखिएको छ ।

तर सरकारले भने तेल खरिद नगर्नेमाथी कारवाही गरिने जनाएको छ । पम्प व्यवसायीले तेल खरिद नगरे कानूनअनुसार कारबाही गर्ने नेपाल आयल निगमका प्रवक्ता विनितमणी उपाध्यायले बताए।

इन्धन ढुवानी गर्ने ट्यांकरका चालकहरुको भने आन्दोलन फिर्ता भएको छ ।

नेपाल आयल निगम र नेपाल पेट्रोलियम ट्यांकर चालक संघबीच भएको वार्तामा ट्यांकर चालकलाई बुधबारदेखि खोप उपलब्ध गराउने सहमति भएपछि आन्दोलन फिर्ता भएको हो ।

ट्यांकर चालकलाई भने बुधबारदेखि खोप लगाइँदै छ । उनीहरुलाई बलम्बु पुलिस हस्पिटलबाट खोप लगाइने छ।