काठमाडौँ । कोरोना भाइरस (कोभिड–१९)विरुद्धको खोप लगाइदिने भएपछि इन्धन ढुवानी गर्ने ट्यांकर चालकले गरेको आन्दोलन फिर्ता भएको छ । सरकारले खोप दिने भएपछि इन्धन ढुवानी गर्ने ट्यांकरका चालकहरुको आन्दोलन फिर्ता लिएका हुन् ।

नेपाल आयल निगम र नेपाल पेट्रोलियम ट्यांकर चालक संघबीच भएको वार्तामा ट्यांकर चालकलाई भोलि बुधबारदेखि खोप उपलब्ध गराउने सहमति भएको छ । ‘बुधबारबाट एपीएफ अस्पताल बलम्बुमा खोप लगाउने सहमति भयो,’ संघका अध्यक्ष ईश्वर लामाले भने, ‘हामीले गर्दै आएको आन्दोलन फिर्ता लिने निर्णय गरेका छौँ ।’

बागमती प्रादेशिक डिपो कार्यालय थानकोटका ट्यांकर चालक र सहचालकले निगमले उपलब्ध गराएको परिचय पत्रको आधारमा खोप लगाउन पाउने भएका हुन् । दुई पक्षबीच भएको सहमतिअनुसार थानकोट डिपोले करिब ९ सय चालक तथा सहचालकलाई खोप लगाउन परितय पत्र दिनु पर्ने छ ।

यस्तै अमलेखगञ्जबाट झण्डै एक हजार ४ सय चालक–सहचालकलाई उतै खोप दिने सहमति भएको भएको छ । कोरोनाविरुद्धको खोप नपाएको भन्दै नेपाल पेट्रोलियम ट्यांकर चालक संघको आह्वानमा बागमती प्रदेशभर आइतबारदेखि पेट्रोलियम पदार्थको ढुवानी अवरुद्ध भएको थियो ।