रसुवा । नेकपा माओवादी केन्द्रका अध्यक्ष पुष्पकमल दाहाल(प्रचण्ड)लाई रसुवा जिल्ला कमिटिले ३८ बुँदे सुझाव पठाएको छ । अबको पार्टीको राजनैतिक वैचारिक पक्ष, संगठनात्मक संरचना, नेता-कार्यकर्ताको आचरण, राष्ट्रियता र अन्य विषयमा केन्द्रीत रहेर रसुवा जिल्ला कमिटीले प्रचण्डलाई सुझाव पठाएको हो ।

माओवादी रसुवा जिल्ला कमिटीको जेठ २९ गते बसेको बैठकमा उठेका छलफल र निष्कर्षका आधारमा जिल्ला कमिटीका तर्फबाट अध्यक्ष इन्द्रप्रसाद गोतामे (जगतजंग)ले प्रचण्डलाई सम्बोधन गरेर सुझाव पठाएका हुन् ।

सुझावमा पार्टी हेडक्वटर व्यवस्थित, चुस्त, दुरुस्त बनाउँदै योजना तर्जुमा, सुचना संकलन र सम्प्रेषण, जनमानसमा उठेका कुराप्रति समयमै जवाफदेहिता हुन आवश्यक देखिएकोदेखि नक्कली राष्ट्रवादको नाममा भएको राष्ट्रिय आत्मसमर्पणवादको व्यापक भण्डाफोर गर्ने कार्य नीति बनाउनसम्म सुझाव दिइएको छ ।

एमसीसी तथा हिन्द–प्रशान्त जस्ता सैन्य रणनीतिलाइ कुनै पनि हालतमा लागु हुन नदिने गरी पार्टीले भूमिका खेल्नु पर्नेदेखि सबै संगठन र संघर्षहरुमा जनताको सहभागिता, नेता तथा कार्यकर्ताहरुमाथि जनताको निगरानी, नियन्त्रण र आवश्यकता परेमा जनताको हस्तक्षेपसमेत गर्न सकिने नीतिको निर्माण गरेर जानु पर्नेमा जोड दिइएको छ ।

त्यस्तै, अधिकार सम्पन्न विज्ञहरुको अनुशासन, अख्तियार र मुल्यांकन आयोग गठन गरी नेता कार्यकर्ताका आचरण सम्बन्धि उठेका सवालहरुको निरन्तर हल गर्नु पर्नेमा पनि रसुवा माओवादीले प्रचण्डलाई सुझाव पठाएको छ ।

एक व्यक्ति, एक पद र मुख्य मुख्य क्रान्तिको अवस्थाबाहेक मुख्य पदमा दुई कार्यकालको नीतिलाई अबलम्वन गर्नु पर्नेमा जोड दिनुपर्ने सुझाव रसुवा माओवादीको छ ।

हेर्नुहोस् रसुवा माओवादीले प्रचण्डलाई पठाएको सुझावपत्र