काठमाडौँ । पूर्व प्रधानमन्त्री तथा नेकपा एमालेका वरिष्ठ नेता झलनाथ खनालले आफू निको भएर स्वदेश फर्केर आउने बताएका छन् । एकपछि अर्को स्वास्थ्य समस्या देखिएपछि डाक्टरहरूको सल्लाहमा थप उपचारका लागि भारतको एपोलो अस्पताल जानुअघि उनले निको भएर फर्केर आउने विश्वास व्यक्त गरेका हुन् ।

देशमा बिथोलिएको राजनैतिक अवस्थाले आफूलाई चिन्तित बनाएको भन्दै खनालले राजनैतिक दलहरू विवाद र ध्रुवीकरणले विभाजन उन्मुख भएका छन् । आगामी दिनमा देशका प्रमुख दलहरू र तिनका नेताबीचको अनावश्यक टकराव, महत्वकांक्षा र व्यक्तिगत इगो साध्ने कार्य यथाशीघ्र अन्त्य गर्न सुझाव दिए ।

‘हाम्रो पार्टी नेकपा (एमाले) सयौँ सहिदहरूको बलिदान, हजारौं योद्धाहरूको रगत पसिना, कैयौँको प्रवास, जेल, भूमिगत जीवनको संघर्ष, त्याग र तपस्याको कारण सफलताको यो बिन्दुसम्म आइपुगेको हो,’ खनालले प्रेस विज्ञप्ति जारी गर्दै भनेका छन्, ‘यो पार्टी देशको नेतृत्वदायी पार्टी बनोस, राष्ट्र र जनताको हित तथा विकास र समृद्धिको बाहक बनोस् र बन्नेछ भन्ने अपेक्षा राखेको छु ।’

उनले रिस, राग, अहंकार र बदलाभाव त्यागेर पार्टीका वैधानिक प्रकृयाअन्तर्गत फुटबाट जोगाउन तथा एकताबद्ध पार्न सबै नेता तथा कार्यकर्ताहरूलाई विशेष आह्वान गरेका छन् ।

पूर्वप्रधानमन्त्री झलनाथ खनाललाई देखिएको स्वास्थ्य समस्या के हो ?

ज्वरो आएपछि र रगतमा हेमोग्लोबिनको मात्रा कम भएपछि उनलाई गत सोमबार काठमाडौँको थापाथलीस्थित नर्भिक अस्पतालमा भर्ना गरिएको थियो । उनलाई अस्पतालमा अक्सिजनको सर्पोटमा राखिएको थियो ।

नेपालमा भएको उपचारमा उनको स्वास्थ्यमा कुनै सुधार नभएपछि थप उपचारका लागि भारत लगिएको हो ।