काठमाडौं । नेपाली कांग्रेसको केन्द्रीय कार्यसमिति बैठक आज दिउँसो बस्दैछ । सानेपास्थित पार्टी कार्यालयमा दिउँसो २ बजे बोलाइएको बैठकले आसन्न १४औं महाधिवेशनको पूर्वनिर्धारित कार्यतालिका संशोधन गर्नेछ ।

कांग्रेस पदाधिकारी बैठकले यसअघि आगामी भदौ ७ देखि १० गतेसम्म तय भएको पार्टीको १४ औं महाधिवेशनको मिति ९ दिन पर सारेर १६ देखि १९ गतेसम्म गर्ने गरी निर्णय गर्न केन्द्रीय समितिमा सिफारिस गरेको थियो ।

आजको बैठकले पदाधिकारी बैठकको सिफारिसका आधारमा क्रियाशील सदस्यता विवाद टुङ्ग्याउने देखि वडा तहदेखिका अधिवेशनको कार्यतालिका संशोधन गर्ने नेता एनपी साउदले जानकारी दिए ।

त्यस्तै बैठकमा मुलुकको समसामयिक राजनीति, प्रतिनिधि सभा विघटनविरुद्ध सर्वोच्च अदालतमा दर्ता भएको रिट र प्रधानमन्त्रीमा पार्टी सभापति शेरबहादुर देउवाको दाबीलगायत विषयमा पनि छलफल हुने केन्द्रीय सदस्य साउदले बताए ।