काठमाडौँ । काठमाडौँ उपत्यकाका तीन जिल्ला प्रशासनले पसलहरू खोल्न दिने भएको छ । निषेधाज्ञा थप एक हप्ता थप गरिए पनि पसलहरू खोल्न दिने निर्णय गरेको ललितपुर जिल्लाका प्रमुख जिल्ला अधिकारी (सिडिओ) ढुण्डी प्रसाद निरौलाले जानकारी दिए ।

उनका अनुसार थप गरिएको निषेधाज्ञामा बारका आधारमा व्यवसाय सञ्चालन गर्न पाइने भएको छ । उनका अनुसार आइतबार, मंगलबार र बिहीबार सुनचाँदी, भाँडा, विद्युतीय, घरायसी सामान बिक्रीसँग सम्बन्धित पसल सञ्चालन गर्न पाइने छ । यस्तै, अटोमोबाइल र त्यसका पार्टपूर्जासम्बन्धी पसलसमेत खुलाउन पाइने छ ।

सोमबार, बुधबार र शुक्रबार सपिङ मल, खेलकुद सामग्री पसल, कपडा, जुत्ता पसल खोल्न पाइने भएको छ ।

बारका आधारमा खुल्ने पसल बिहान ११ देखि दिउँसो ४ बजेसम्म खोल्न पाइने भएको छ । यसबीच खाद्यान्न, फलफूल तथा तरकारी पसल भने हरेक दिन ११ बजेसम्म खोल्न पाइने भएको छ ।