काठमाडौं । नेपाली कांग्रेसको १४औं महाधिवेशनमा सभापतिको उम्मेद्वार बन्ने घोषणा गरेका डा. शेखर कोइरालाले आइतबारबाट नेताहरूसँग ‘वान टु वान’ वार्ता गरिरहेका छन् ।

सभापति शेरबहादुर देउवा र नेता रामचन्द्र पौडेलसँग परम्परागत गुट छ । तर, कोइरालाको भने व्यक्तिगत सम्बन्ध र कोइराला परिवारको लिगेसी मात्रै हो । तसर्थ उनले नेताहरूसँग व्यक्तिगत डिल गरेर आफ्नो पक्षमा तान्ने प्रयास गरिरहेका छन् ।

आइतबार नेपाल विद्यार्थी सँघका पूर्वअध्यक्ष तथा पार्टीका नेता बलबहादुर केसीसँग लामो छलफल गरेका डा. कोइरालाले सोमबार भने पूर्वमहामन्त्री प्रकाशमान सिंह, गगन थापासहितका युवा नेताहरूसँग छलफल गरे ।

सिंहसँग डेढ घण्टासम्म छलफल भएको उनको सचिवालयले जनाएको छ । उनी आज पनि वान टु वान वार्तामा मै रहनेछन् । उनले यसबीचमा अर्जुननरसिंह केसी, डा.रामशरण महत, बर्दिया सभापति सञ्जय गौतम, धनराज गुरुङलगायतलाई पनि वान टु वान भेटेका छन् ।

स्वकीय सचिव दिनेशचन्द्र थपलियाले नेताहरूसँग भेटघाट भइरहेको बताए । ‘अहिले भेटघाटमै व्यस्त हुनुहुन्छ । प्रायगरी वान टु वान भेटघाटमै उहाँ व्यस्त हुनुहुन्छ । नेताहरूसँग सुझाव लिने र त्यसै अनुरुप आफ्नो तयारीलाई अगाडि बढाउने पक्षमा उहाँ हुनुहुन्छ,’ थपलियाले भने ।

डा. कोइरालाले सिंहलाई संसदीय दलको नेता र प्रधानमन्त्रीको उम्मेदवारमा प्रस्ताव राखेर सभापतिमा आफूलाई सहयोग गर्न आग्रह गरेका छन् । सिंहले भने त्यसमा जवाफ नफर्काएको स्रोतहरू बताउँछन् ।

यता कोइरालालाई नौ युवा केन्द्रीय सदस्यको टिमले सहयोग गरिरहेको छ । दीपक गिरी र चन्द्र भण्डारी नेतृत्वको नौ केन्द्रीय सदस्यको टिमले उनलाई सहयोग गरिरहेको हो ।

टिममा गुरुराज घिमिरे, कल्याण गुरुङ, बद्री पाण्डे, नेविसंघका पूर्वअध्यक्ष रञ्जित कर्णसहितका नेताहरू छन् । कोइरालालाई अर्जुननरसिंह केसी, डा. रामशरण महतको पनि समर्थन रहेको छ ।

महाधिवेशनका लागि भनेर सबैभन्दा धेरै जिल्ला घुम्ने र नेता कार्यकर्तासँग अन्तक्र्रिया गर्ने मामलामा कोइराला पहिलो नम्बरमा छन् ।