काठमाडौँ । नेपाल कम्युनिष्ट पार्टी एमाले दशौं राष्ट्रिय महाधिवेशन आयोजक समितिले कर्णालीमा फ्लोर क्रस गर्ने पार्टीका चार सांसदहरूलाई कारबाही गर्न नमिल्ने सर्वोच्चको आदेशमा पुनरावलोकन निवेदन (भ्याकेट)को आज सुनुवाइ हुँदैछ ।

नेकपा एमालेका अध्यक्ष केपी शर्मा अ‍ोलीले सर्वोच्च अदालतमा दर्ता गरेको भ्याकेट निवेदनमाथि न्यायाधीश आनन्दमोहन भट्टराई र हरि फुयालको संयुक्त इजलासमा सुनुवाइका लागि पेशी तोकिएको छ ।

कर्णाली प्रदेशका एमाले नेता माधव कुमार नेपाल पक्षका प्रकाश ज्वाला, नन्दसिंह बुढा, कुर्मराज शाही र अमरवहादुर थापाले ह्वीप उल्लंघन गरेर फ्लोर क्रस गरेपछि पार्टी विधान र राजनीतिक दल सम्बन्धी ऐन बमोजिमका प्रक्रिया पूरा गरेर भएको कारवाही र पदमुक्तिलाई न्यायाधीश प्रकाशमान सिंह राउतको एकल इजलासले अन्तरिम आदेशमार्फत बदर गरेको थियो ।

उक्त आदेश खारेजीको माग गर्दै ओलीसहित कर्णाली प्रदेश सभा सचिवालयले आइतवार भ्याकेट निवेदन दिइएको थियो । एमालेको केन्द्रीय कमिटीले निर्णय गरेर दशौं राष्ट्रिय महाधिवेशन आयोजक कमिटी गठन गरेकाले एमालेको आधिकारिक कमिटीले गरेको कारवाहीलाई मान्यता दिन माग गरिएको छ ।