काठमाडौँ । कोरोना भाइरस कोभिड १९ को दोस्रो लहर फैलीएसँगै भएको निषेधाज्ञा आजबाट खुकुलो भएपछि जनजीवन सामान्य भएको छ । काठमाडौँ उपत्यकाका तीन जिल्लामा गत वैशाख १६ गतेदेखि निषेधाज्ञा गरिएको थियो ।

एक महिनाभन्दा बढी कडा निषेधाज्ञा गरेको उपत्यका प्रशानले पछिल्ला दिनमा खुकुलो गर्दै गएको थियो । कोरोना संक्रमणको संख्यामा कमि आउन थालेपछि आजबाट लागुहुने गरी निषेधाज्ञा खुकुलो गरिएको हो ।

काठमाडौं, भक्तपुर र ललितपुरका प्रमुख जिल्ला अधिकारीहरुको आइतबार बसेको बैठकले जनस्वास्थ्यका मापदण्ड पालना गरेर जनजीवन सहज बनाउन सर्तसहित निषेधाज्ञा खुकुलो गर्ने निर्णय गरेको थियो ।

सपिङ मल, फेन्सी, गरगहना पसल, खेलकुद सामग्री, स्टेसनरी, विद्युतीय उपकरण, निर्माण सामग्री, टायल, मार्बल फर्निचरलगायतका व्यापार/व्यवसाय बारअनुसार खुल्न दिने बैठकले निणय गरेको थियो । यस्तै, चारपांग्रे निजी सवारी र ट्याक्सीलाई जोर–बिजोर एवं सिट संख्या निर्धारण गरेर सञ्चालन गर्न बैठकले अनुमति दिएको थियो ।