काठमाडौं । नेपाल विद्युत् प्राधिकरण मातहतका आयोजनाको बिजुली उत्पादन कटौती भएपछि निजी क्षेत्रका आयोजनाको बिजुली उत्पादनको मात्रा बढी देखिएको छ ।
निजी क्षेत्रका आयोजनाबाट हाल ११ हजार ७० मेगावाट बिजुली उत्पादन भइरहेको प्राधिकरणले जनाएको छ ।
प्राधिकरणले कुलेखानी जलविद्युत् आयोजनाबाट बिजुली उत्पादन हाल बन्द गरेको जनाएको छ ।
यस्तै, कालीगण्डकी लगायतका आयोजनाले पनि बाढी पहिरोका कारण पूर्णक्षमतामा उत्पादन गरेका छैनन् । सोही कारण निजी क्षेत्रका आयोजनाको उत्पादन बढी रहेको प्राधिकरणका प्रवक्ता मदन तिम्सिनाले जनाएका छन् ।
बर्षाको समयमा समेत भारतबाट बिजुली आयात भइरहेको छ । प्राधिकरणको भार प्रेषण केन्द्रका अनुसार कुल आयात ६ हजार ८ सय २३ मेगावाट घण्टा रहेको छ । यस्तै, प्रणालीमा ३० मेगावाट घण्टा अवरोध देखिन्छ । बाढी तथा बर्षाका कारण अवरोध भएको हो ।
वर्षाको समय भएपनि निषेधाज्ञा खुकुलो हुँदा बिजुली माग अलिक बढेको छ । हाल प्रणालीमा २६ हजार ६ सय २९ मेगावाट घण्टा विद्युत् माग रहेको छ ।
हाल मेगावाटका आधारमा पिक डिमाण्ड १ हजार ३ सय ३४ मेगावाट रहेको छ ।